Bul týraly О́ńirlik kommýnıkasııalar qyzmeti alańynda ótken baspasóz jıynynda Abaı oblysy bilim basqarmasynyń basshysy Baýyrjan Erdembekov aıtyp berdi.
«Abaı oblysynda aımaq basshysynyń bastamasymen mektepke deıingi jáne orta bilim berý ınfraqurylymyn damytý baǵytynda júıeli jumystar atqarylyp jatyr. О́ńirde 177 balabaqsha jáne 191 shaǵyn ortalyq jumys isteıdi. Qazir 3,9 myńnan astam bala kezekte tur, onyń ishinde 2-6 jas aralyǵynda 758 bala bar. Oryn tapshylyǵyn azaıtý maqsatynda bıyl 5 jekemenshik balabaqsha ashylyp, Maqanshyda salynatyn 140 oryndyq balabaqshanyń qujattary ázirlenip jatyr», dedi basqarma basshysy.
Onyń málimetinshe, Abaı oblysynda qazir 311 mektep jumys istep tur. Jalpy, óńirde 2025-2026 oqý jylynda 100,6 myń oqýshy bilim alady.
«Sondaı-aq Semeı qalasynyń Oń jaq Shyǵys kentinde 300 oryndyq mekteptiń qurylysy júrgizilýde. Sýyqbulaqta 100 oryndyq bilim oshaǵynyń qurylysy bastalyp, Ekpin jáne Semeı qalalarynda 300 oryndyq mektepterdiń jobalary ázirlenip jatyr. «Qazaqstan halqyna» qory arqyly 36 mektepke 58 jańa kabınet ornatylyp, 4 mektepke (Jańasemeı, Maqanshy, Kýrchatov, Úrjar) árqaısysyna 250 mln teńgege oqý kabınetteri men jıhazdar satyp alyndy. Aıta keteıik, Semeı qalasyndaǵy 500 oryndyq oqýshylar saraıynyń qurylysy jeltoqsan aıynda aıaqtalyp, el ıgiligine beriledi», deıdi B.Erdembekov.
Abaı oblysy
