Atap aıtsaq, «RG BRANDS Kazakhstan», «Coca-Cola Almaty Bottlers», «Hamle Company LTD», «Asia Agro Food», «Efes Kazakhstan», «Kagazy Recycling», «Kelun – Kazpharm» sııaqty kásiporyndar bar. Aýdanda jańa ınvestorlardy tartý baǵytynda júıeli jumystar júrgizilip jatyr.
Bıylǵy qańtar-qyrkúıek aılarynda negizgi kapıtalǵa tartylǵan ınvestısııanyń 85 paıyzy jekemenshik ınvestısııalar esebinen júzege asyryldy. Bul – aýdannyń ınvestısııalyq tartymdylyǵy joǵary, bıznes júrgizý úshin qolaıly óńir ekenin kórsetedi. Atalǵan kezeńde 10-ǵa jýyq iri jobalar iske qosylyp, shamamen 2300 jańa jumys orny ashyldy. Kókózek aýylynda Ońtústik Koreıalyq «KT&G» kompanııasynyń zaýyty iske qosylyp, 140 jumys orny quryldy. Isaev aýylynda «Fokýs Logıstık» kesheniniń 1-shi jáne 2-kezeńderi iske qosylyp, jalpy 1500 adam jumyspen qamtyldy. Keshen tolyq qýatymen jumys istegen jaǵdaıda, 4,5 myń jańa jumys orny qurylady. Aýdannyń bıýdjetine jyl saıyn 5 mlrd teńgeden astam salyq túsýge tıis. Budan bólek, jýyrda «Apple Logistics» kesheniniń birinshi kezeńi aıaqtalyp, 148 adam turaqty jumysqa ornalasty. Sondaı-aq «Neo Milk» kompanııasy eshki, bıe, túıe sútin qurǵatyp óndiretin zaýyttyń qurylysyn aıaqtap, 50 adamdy jumyspen qamtydy.
«Raw Production Ltd» qus etin qaıta óńdeý zaýyty iske qosylyp, 100 adam turaqty jumysqa ornalastyryldy. Buǵan qosa «Boraldaı konteıner termınaly» qurylysy tolyqtaı aıaqtalyp, 70 jumys orny ashyldy.
«Prezıdent Qasym-Jomart Toqaev «Investısııa tartý – ortalyq atqarýshy organdardyń ǵana mindeti emes, jergilikti bılik pen ákimderdiń de jaýapkershiligi», dep atap ótken edi. Osy talap údesinen shyǵyp, aýdanymyzda ınvestısııalyq ahýaldy jaqsartý úshin naqty sharalar qabyldanyp, jańa jobalardy iske asyrý jumystary belsendi túrde júrgizilip jatyr. Bıyl jalpy quny 100 mlrd teńgeden asatyn 20-ǵa jýyq jańa iri ınvestısııalyq joba iske asyrylýda», deıdi Qarasaı aýdanynyń ákimi Jasulan Estenov.
Negizgi jobalar qatarynda «MP Solutions» logıstıkalyq kesheniniń qurylysy (14 mlrd teńge), «Jiang nan Kazakhstan» kompanııasy ónerkásiptik logıstıkalyq aımaq (10 mlrd teńge), «Alǵa Maks» polıstırolbeton plıtalaryn óndiretin zaýyty (5 mlrd teńge), «Atek group» avtoklavty kirpish zaýytynyń qurylys jobalary (1,2 mlrd teńge) bar.
Odan bólek, «Casrian Beverage Holding» alkogolsiz sýsyndar shyǵaratyn jańa zaýyt salý úshin daıyndyq jumystaryn júrgizip jatyr. Jobaǵa 15,8 mlrd teńge ınvestısııa tartylady. Bul bastamalar aýdannyń ınvestısııalyq tartymdylyǵyn arttyryp, jańa óndiris oryndaryn ashýǵa jáne jumyssyzdyqty azaıtýǵa aıtarlyqtaı serpin bermek.
Bıyl tamyz aıynan iske qosylǵan «Burunday container terminal» (Boraldaı konteıner termınaly) JShS operasııalyq dırektory Asqar Jumadilovtiń aıtýynsha, kópsalaly konteınerlik termınalǵa alys-jaqyn shetelden táýligine 100-120 konteıner kelip, ony ýaqtyly qabyldap, júkterdi túsirip, saqtap, suryptaýǵa múmkindik jasalǵan. Júktiń negizgi bóligin – shetelden tasymaldanatyn avtokólikter quraıdy. Mýltımedııalyq termınaldyń basty aıyrmashylyǵy – tutynýshyǵa «jeke kabınet» ashylyp, sol arqyly 24 saǵat óz júgin baqylaı alatynynda.
Jalpy aýmaǵy 16,5 sharshy metrge ornalasqan konteınerlik alań halyqaralyq standarttarǵa saı jabdyqtalǵan ári tolyqtaı avtomattandyrylǵan. Mamandar bul nysan – Almaty aglomerasııasy men basqa aımaqtar úshin halyqaralyq jáne ishki júk tasymalyn ońtaılandyratynyn aıtady. Sondaı-aq logıstıkalyq kompanııalar men óndirýshilerge qoımalaý, kedendik jáne ekspedıtorlyq qyzmetterdi bir jerden alýyna múmkindik beredi. Termınalda búginde 40 adam eńbekpen qamtylǵan. Tolyq qýattylyǵy júzege asqanda jumysshylar sanyn 150 adamǵa jetkizý josparlanǵan.
Jarmuhanbet aýylynda ornalasqan «Almaty Turmystyq Tehnika Zavody» (Almaty turmystyq tehnıkalyq zaýyty) JShS zamanaýı turmystyq tehnıka óndirýmen aınalysyp keledi. 2021 jyly iske qosylǵan kásiporynnyń ónimderi «Dauscher» saýda markasymen tanymal.
Jobanyń maqsaty – ishki naryqtyń qajettilikterin óteýge jáne ımportqa táýeldilikti aıtarlyqtaı tómendetýge qabiletti turmystyq tehnıkanyń tolyqqandy, táýelsiz óndirisin qurý. Búginde kásiporyn gaz ben elektr plıtalaryn, peshterdi, shaǵyn peshterdi shyǵarady. Aldaǵy ýaqytta tońazytqyshtar, muzdatqyshtar men teledıdarlar shyǵarý josparlansa, búginniń ózinde alǵashqy tapsyrystar qabyldanyp, tutynýshylar tilegin qanaǵattandyrǵan.
Zaýyttyń óndiristik qýaty kezeń-kezeńimen júzege asyrylyp jatyr. Jyl saıyn jańa joǵary tehnologııalyq sehtar, onyń ishinde metall óńdeý, avtomattandyrylǵan syrlaý, emaldaý sehtary, sondaı-aq polıstırol kóbik qaptamasyn óndirý ýchaskesi paıdalanýǵa beriledi. Kásiporynnyń qýattylyǵy jylyna 200 myń birlikke deıin ónim shyǵarýdy, 200-den astam jumys ornyn ashýdy kózdeıdi.
Búginde «Almaty Turmystyq Tehnika Zavody» JShS ónimderi Technodom, Sulpak, Mechta, Fora syndy elimizdiń iri saýda jelilerinde usynylǵan. Sondaı-aq bes fırma saýda núkteleriniń jelisi jumys isteıdi.
«ATTZ» JShS dırektory Arsen Kúshtaev kásiporyndy keńeıte otyryp, otandyq tutynýshylardyń sapaly da senimdi ári básekege qabiletti turmystyq tehnıkaǵa qol jetkizýin qamtamasyz etý – basty maqsat ekenin aıtty.
Qýaty tolyq iske qosylǵanda táýligine 200 myń turmystyq tehnıka túrlerin shyǵarýdy dittegen zaýytta bıyl 65 myń tehnıka shyǵarsa, keler jyly ónimdi eselep, 130 myńǵa jetkizý josparlanǵan. Ár shańyraqtyń turmysyn jeńildetýge septigin tıgizer tehnıkalardy jasaýda Eýropanyń tanymal kompanııalarynan bólshekter satyp alynatyndyǵyn alǵa tartty.
«Biz óndirgen tehnıkanyń 50 paıyzy Reseı, Qyrǵyzstan men О́zbekstanǵa eksportqa jóneltiledi. «Qazaqstanda jasalǵan» degen brendti tutynýshylar jyly qabyldap jatyr. О́ndiriste el boıynsha 2-oryndamyz. Basty qaǵıdamyz – adam aǵzasyna zııansyz joǵary sapada ári qoljetimdi bolý. Osy sebepti, keı bólshekter shetelden alynady. Mysaly, peshke kerek áınekti Germanııadan, elektornıkany Ispanııadan, ottyqtaryn Italııadan, emaldyń boıaýlaryn Reseıden, al metall ónimderi ózimizde óndiriledi», deıdi zaýyt dırektory Arsen Kúshtaev. Bul kúnde 100 shaqty adam eńbek etetin zaýyttyń ınvestısııa kólemi 7,5 mln dollar. Byltyr 2,5 mln dollar salynyp, jańa sehtar iske qosyldy.
Almaty oblysy
