Soltústik Qazaqstan – topyraǵy quıqaly, jeri jomart, ósimdik sharýashylyǵyna qolaıly óńir. Sharýalardyń eren eńbeginiń nátıjesinde bıyl óńir qambasy astyqqa tolyp, rekordtyq ónim jınaldy. Jyl saıyn oblystaǵy maıly daqyldar sebiletin alqaptardyń úlesi de artyp keledi. Kúzde eńbek adamdary egis alqabynan 1,2 mln tonna maıly daqyl jınaǵan. Endigi kezekte ónimdi shashpaı-tókpeı, kerekke jaratyp, tıimdi óndeý qajet. Úkimettiń aldynda aýyl sharýashylyǵyndaǵy óndeletin ónimniń úlesin 70 paıyzǵa jetkizý mindeti turǵanyn eskersek, atalǵan salaǵa aýqymdy qoldaý qajet.
Oblys ortalyǵynda «Maslo-Del» maı zaýyty ashylǵaly jergilikti dıqandar ónimin ótkizý úshin alysqa sabylmaıtyn boldy. Jańa óndiris orny kúnine 1,5 myń tonna maıly daqyl qabyldaıdy. Odan shyǵatyn ónim túrleri de san alýan. Osylaısha, bir ǵana iri joba óńirdegi aýyl sharýashylyǵynyń damýyna serpin berip, júzdegen adamdy jumyspen qamtyp, azyq-túlik óndirisindegi oblys áleýetin arttyryp otyr. Bul nátıjege qol jetkizýde Qazaqstannyń Damý Banki («Báıterek» holdınginiń enshiles uıymy) kórsetken júıeli qoldaýdyń orny erekshe.
«Zaýytta kúnbaǵys, raps, soıa, zyǵyr dáni óńdeledi. Byltyr ashylǵan óndiris ornynda 250 adam turaqty jumyspen qamtylǵan. Jyl saıyn naryqqa 200 myń tonna maı shyǵarýǵa múmkindigimiz bar. Dánnen maı syǵý úshin eýropalyq ozyq tehnologııalardy paıdalanamyz. Munyń bári Qazaqstannyń Damý Bankiniń qarjylaı qoldaýynsyz júzege aspas edi. Berilgen qarajatty ondaǵan jyldar boıy aqtaıtyn uzaq merzimdi jobalarǵa qarjy quıatyndardy tabý qıyn. Al memlekettik qoldaý baǵdarlamasy aıasynda Qazaqstannyń Damý Banki arqyly tómen paıyzben qarjy tartýǵa múmkindik bar», deıdi «Maslo-Del» kompanııasynyń bas dırektory Pavel Selıvanov.
Otandyq bank zaýyn qurylysyna 11 mıllıard teńge qarjy quıǵan. «Maslo-Del» seriktestigi men Qazaqstannyń Damý Bankiniń áriptestigi áli de jalǵasyp keledi. Qazir óndirýshi banktiń eksportty qarjylandyrý baǵdarlamasy arqyly qoldaý kórip otyr. Nátıjesinde 2014 jyly syrtqa 3 mıllıard teńgeniń ónimin satqan seriktestik bıyl bul kórsetkishti 28 mıllıardqa jetkizgen.
«Aldaǵy tańda zaýytty keńeıtip, óndiris qýattylyǵyn arttyrý jospary bar. О́nimin bizge ótkizgisi keletin dıqandar kóp. Alaıda jetkiziletin maıly daqyldyń bárin qabyldap úlgere almaımyz. Sondyqtan bıyl dándi keptiretin qosymsha qondyrǵylar ornatyp, shıkizatty saqtaý ornyn keńeıtemiz. Bul bastamaǵa da Qazaqstannyń Damý Banki arqyly qarjy tartý qarastyrylyp jatyr. Oǵan qosa memlekettik qoldaý sharalary arqyly Almatydaǵy maı kombınatyn jańǵyrtqymyz keledi», deıdi Pavel Selıvanov.
Búginde óńirdegi maı zaýyttary tolyq qýattylyqta jumys isteı almaı otyr. Oǵan sebep – shıkizattyń jetkiliksizdigi. Sonyń saldarynan kásiporyndar arasynda básekelestik paıda bolǵan. Bul tyǵyryqtan shyǵý úshin de «Maslo-Del» kompanııasy Qazaqstannyń Damý Bankiniń qoldaýyna ıek artyp keledi. Banktiń der kezinde berilgen qarjysy esebinen zaýyttyń aınalymdaǵy qarajaty artyp, shıkizatty tıisti merzimde tıimdi satyp alyp otyr.
