Keń ári jaryq ǵımaratta sport pen salaýatty ómir saltyn súıetinder úshin barlyq jaǵdaı jasalǵan – basseın, trenajer zaly, boks jáne ústel tennısi zaldary, jekpe-jek zaldary jáne oıyn sport túrlerine arnalǵan ámbebap alań bar.
«Bizdiń oblys aýmaǵynda taǵy bir sport nysanyn ashý men úshin úlken mártebe. Bul joba Memleket basshysy júktegen buqaralyq jáne balalar sportyn damytý tapsyrmasy aıasynda júzege asyrylýda. Aldaǵy ýaqytta bul nysan aýdannyń ǵana emes, búkil óńirdiń sporttyq jáne mádenı is-sharalary ótetin ortalyǵyna, úlken jeńister men rekordtar ordasyna aınalady dep senemin», – dedi Marat Ahmetjanov.
О́ńir basshysy aqmolalyq sportshylardyń árdaıym jetistikterimen tanylǵanyn atap ótti. Bul qatarda Býrabaı aýdany sportshylarynyń orny erekshe. Olardyń arasynda – táýelsiz Qazaqstannyń alǵashqy Olımpıada chempıony, tórt dúrkin shańǵy jarysy boıynsha álem chempıony Vladımır Smırnov, shańǵy jarysy boıynsha álem chempıonatynyń qola júldegeri Nıkolaı Chebotko, sondaı-aq shańǵyshylar, bıatlonshylar, boksshylar, erkin kúres sheberleri bar. Olar joǵary nátıjelerge qol jetkizip, óńir men eldiń atyn halyqaralyq arenalarda asqaqtatty.
Sport saraıynda qazirdiń ózinde jattyǵý prosesi júrip jatyr. Balalar júzý, kúres, gımnastıka, boks seksııalarynda daıyndalýda. Mereıli kúni jas sportshylarǵa Olımpıada oıyndarynyń chempıondary men júldegerleri — Dmıtrıı Balandın, Sergeı Kotenko jáne Iýrıı Melnıchenko syndy qonaqtarmen qol alysyp, tildesýdiń qurmeti buıyrdy. Eń batyldary qazaqstandyq sport ańyzynyń avtografyn aldy.
Aıta keteıik, búginde óńirde 1 124 sport nysany bar, olardyń jartysynan astamy aýyldyq jerlerde ornalasqan.
