Sýret JI kómegimen jasaldy
Osy jumystyń alǵashqy nátıjeleriniń biri – kásipkerdiń biryńǵaı jeke kabıneti. Qazir ol synaq rejiminde jumys istep tur. Erekshiligi – mınıstrliktiń negizgi memlekettik qyzmetterin bir jerde biriktiredi. Endi kásipkerler memlekettik satyp alýǵa qatysyp, salyq jáne keden deklarasııalaryn tapsyryp, elektrondy shot-faktýra jazyp, salyq tólep, qarjy eseptiligin bir ınterfeıste basqara alady. Bul ýaqytty únemdep, ákimshilik júktemeni aıtarlyqtaı jeńildetedi.
Jasandy ıntellekt bızneske keńes beredi
Mınıstrlik sıfrly modernızasııamen qatar jasandy ıntellekt tehnologııalaryn engizýge erekshe kóńil bólip otyr. Sol jobalardyń ishinde bolashaǵy zor sheshim – JI bıznes-kómekshisi. Bul qural kásipkerlerge bıznes ıdeıa paıda bolǵan sátten bastap onyń naqty iske asýyna deıin kómek kórsetetin tolyqqandy sıfrly keńesshi retinde ázirlenip jatyr.
JI-dyń eń mańyzdy qyzmetteriniń biri – bolashaq kásipke eń tıimdi oryndy tańdap berý. Lokasııa – tabystyń negizgi faktorlarynyń biri. Durys tańdalǵan meken satý deńgeıin kóteredi, básekelesti durys baǵalaýǵa kómektesedi jáne shyǵyndy azaıtady. Al orynnyń sátsiz bolýy tabysty tómendetip, shyǵyndy kóbeıtedi.
JI memlekettik aqparattyq resýrstarmen ıntegrasııalanǵan jáne aýdandardyń ekonomıkalyq belsendiligin, suranys qurylymyn, jumyspen qamtý deńgeıin, básekelestik ortany, salalardyń damý dınamıkasyn taldaıdy. Algorıtmder osy derekter negizinde ár lokasııa boıynsha kútiletin kiris kólemin, rentabeldilikti, táýekelderdi boljap, daıyn usynys bere alady.
Bul tásil sheshimderdiń dáldigin arttyryp, ásirese shaǵyn jáne orta bıznes úshin bastapqy kezeńdegi qatelikterden saqtanýǵa múmkindik beredi. Nátıjesinde derekterge negizdelgen jańa bıznes mádenıeti qalyptasady.
Bıznes kómekshińiz bola alady
Sıfrly jańǵyrtýdyń aldaǵy kezeńi – memlekettik qyzmetterdiń proaktıvti túrde usynylýy. Derekter jetkilikti jınaqtalǵan saıyn memlekettik júıeler kásipkerlerdiń qandaı kómekke muqtaj ekenin ózderi anyqtap, arnaıy baǵdarlamalardy, jeńildikterdi jáne mańyzdy habarlamalardy avtomatty túrde usyna alady.
Bul – qyzmetti kásipker izdemeıtin, kerisinshe, júıe kásipkerdi ózi taýyp, usynys beretin model.
Memlekettik servısterdi ıntegrasııalaý, biryńǵaı kabınet qurý jáne JI tehnologııalaryn engizý – elde jańa sıfrly ekojúıeni qalyptastyrýda mańyzdy ról atqarady. Nátıjesinde kásipkerler úshin jumys isteý úderisi jyldam, tıimdi jáne zamanaýı standarttarǵa jaqyndaıdy, al memlekettik organdarmen ózara is-qımyl jeńildeıdi.
