Oblys ákimdigi uıymdastyrǵan jyr dodasyna Tobyl-Torǵaı óńiriniń ótkeni men búgini, keleshegi arqaý bolyp, mereıtoı ıesiniń aqyndyq óneri, aıtysty damytýǵa qosqan úlesi dáripteldi.
Alty saǵatqa sozylǵan alamannyń 3 mln teńge syıaqysy bar bas júldesin Abaı oblysynyń atynan shyqqan Ásem Erejeqyzy jeńip aldy. Qazylar alqasynyń uıǵarýymen birinshi orynǵa (2 mln teńge) aqtóbelik aqyn Nurbol Jaýynbaev laıyq dep tanyldy.
Ekinshi oryn – (1,5 mln teńge) Muhtar Nııazov (Qyzylorda oblysy) pen Jansaıa Mýsınanyń (Batys Qazaqstan oblysy) enshisinde.
Júldeli úshinshi orynǵa (1 mln teńge) Nurlan Esenqulov (Shymkent qalasy) pen Meıirbek Sultanhan (Qyzylorda oblysy) ıet boldy.
Aıtysqa qatysqan ózge aqyndar da 500 myń teńge kóleminde yntalandyrý syılyǵyn aldy.
Aqyndardy marapattaý rásiminde oblys ákimi Qumar Aqsaqalov halyq aqyny Ásııa Berkenova men taıaýda ǵana «Altyn dombyrany» jeńip alǵan aıtys aqtańgeri Aıbek Qalıevtiń aıtys ónerin damytýǵa sińirgen eńbekteri erekshe ekenin atap ótip, el rýhanııatyna qosqan ólsheýsiz úlesteri úshin alǵys bildirdi.
Odan keıin qazylar alqasynyń múshesi Janarbek Áshimjan kópshilikke Senat spıkeri Máýlen Áshimbaevtyń quttyqtaýyn oqyp berip, mereıtoı ıesiniń ıyǵyna shapan japty.
Ásııa aqyn aıtys sahnasyna kezinde Farıza Ońǵarsynova japqan shapandy kıip shyqqanyn, ony mýzeıge tapsyratynyn aıtty.
Al oblys ákimi Qumar Aqsaqalov Tobyl-Torǵaı óńirinen shyqqan qos aqynǵa mesenattar tartý etken sý jańa avtokólikterdiń kiltin tabys etti. Halyq aqyny Ásııa Berkenova «KIA Sportage», aıtys aqtańgeri Aıbek Qalıev «KIA Cerato» kóligin mindi.
Qostanaı oblysy
