Dmıtrıı Bagaevtyń esimi Ertis-Baıan óńiriniń halqyna jaqsy málim. XX ǵasyr basynda osynda qonys aýdaryp, fotosýretshilikpen áýestene bastaıdy. Sóıtip júrip Pavlodar qalasynda alǵashqy fotostýdııany ashqan. Onyń shyǵarmashylyǵynyń nátıjesinde tóńkeriske deıingi Pavlodardyń kelbeti kóptegen fotosýrette saqtalyp qaldy. О́ner ıesi qalamen qosa alys aýdandardy da aralap, qanshama belgili tulǵalardy, qazaqtyń salt-dástúr úlgilerin, ashtyq jyldaryn da sýretke túsirgen. Sonyń ishinde áýlıe Máshhúr Júsip beınesiniń saqtalyp qalýyna yqpal etti. Ol týraly buǵan deıin gazetimizde maqala jarııalaǵanbyz.
Dmıtrıı Polıkarpovıch turǵan úı 2001 jyly onyń atyndaǵy mýzeıge aınaldy. Ol jergilikti mańyzǵa ıe tarıhı jáne mádenı eskertkishter qataryna engen. Alaıda keıingi 25 jylda eshbir jóndeý kórmegeni belgili bolyp otyr. Sonyń saldarynan qazirgi ýaqytta shatyrynan sý saýlap, ǵımarat ishine kirgen ylǵal úıdiń qabyrǵasy men edenin búldirip jatyr.
Mýzeı-úıdiń qyzmetkeri Sholpan Ábikeshovanyń aıtýynsha, kóktem men kúzde tóbeden sorǵalaǵan sýǵa mýzeı ishine shelekter qoıylady. Tipti keıbir jádigerler amalsyzdan alynyp ta tastalady. Olaı jasamasa, sý tıip búlinip qala ma dep qorqady eken. Onyń ústine ǵımarat elektr qýaty arqyly jylytylady. Nysannyń jartylaı aǵashtan salynýy mundaı jaǵdaıda órt qaýpin kúsheıtip otyr.
«Tarıhı nysanǵa ishinara jóndeý júrgizý múmkin emes, ony tolyqtaı jóndeý kerek. Irgetasy, qabyrǵalary, tóbesi, elektr jelileri, barlyǵy jóndeýge suranyp tur. Restavrasııalyq joba daıyn. Jobalyq-smetalyq qujattamaǵa sáıkes barlyq shyǵynǵa 100 mln teńgedeı qarajat qajet», deıdi G.N.Potanın atyndaǵy oblystyq tarıhı-ólketaný mýzeıiniń basshysy Arman Álıakparov.
Biraq jóndeýge qajet qarajat ázirshe tabylmaı tur. Mýzeı qyzmetkerleri keler jyly oılaǵandary bolyp qala ma dep úmittenedi.
Pavlodar oblysy
