«Qazaqstan qalalyq basqarý salasynda, sonyń ishinde, aqyly turaq júıesinde sıfrlyq sheshimderdi belsendi túrde qoldanysqa engizýde. Bul úrdis jaıly jaǵdaı jasap, kólik aǵynyn ońtaılandyrýǵa baǵyttalǵan. Alaıda, is júzinde Almaty men Astana sııaqty iri megapolısterde bul ıdeıanyń júzege asyrylýy azamattar tarapynan zańdy suraqtar týǵyzady. Aqyly turaqtar bastapqyda qala ortalyǵyndaǵy keptelisti azaıtý maqsatynda qurylǵan. Biraq, búginde olar, tipti, turǵyn úı aýdandarynda da jappaı ornatylýda. Turǵyndar óz aýlasynda, úıiniń aldynda turaq úshin aqy tóleýge májbúr. Nátıjesinde, bul myńdaǵan qazaqstandyqtar úshin qosymsha qarjylyq aýyrtpalyq týdyryp otyr», - dep jarııalady Oljas Nuraldınov óziniń depýtattyq saýalynda.
Onyń aıtýynsha, qazirgi júıede tólem ádisterin tańdaý múmkindigi joq.
«Kóptegen turaq aımaqtarynda tek QR kod nemese mobıldi qosymsha arqyly ǵana tólem jasaý múmkindigi bar. Degenmen, qosymshalar keıde qoljetimsiz bolyp, ınternet istemeı, bank kartasy ýaqytsha buǵattalǵan jaǵdaılar bolyp jatady. Jalǵyz amal - qolma-qol aqshamen tóleý, biraq, kóp jaǵdaıda soǵan arnalǵan turaq termınaldary joqtyń qasy. Mundaı azamattarǵa balama tásilderdi usynýdyń ornyna, júıe T100 turatyn turaq orny úshin birden T4000 aıyppul salady. Alaıda, zańnamada qolma-qol aqshamen de, qolma-qol aqshasyz da tólemder jasaý múmkindigi naqty kórsetilgen, sondyqtan, qolma-qol aqshamen tólem jasaý tásiliniń joqtyǵy azamattardyń quqyqtaryna jáne qoljetimdilik qaǵıdatyna qaıshy keledi», - dedi depýtat.
Ol sıfrlandyrý adamdardyń ómirin yńǵaıly etip, kedergilerdi joıý úshin jasalǵanyn, biraq bul jaǵdaıda kerisinshe, kedergiler men qolaısyzdyqtar týyndap jatqanyn eske saldy.
«Oǵan qosa, turaq operatorlary básekelestigi joq ortada jumys isteýde, ıaǵnı, azamattar jumysta, ne úıiniń janynda kólikterin turaqqa qoıar kezde tańdaý múmkindiginen aıyrylyp, belgili bir operatordyń ǵana qyzmetterin, júıesi men tólem ádisin paıdalanýǵa májbúr bolyp otyr. Eń bastysy, qarjylyq aǵyndardyń ashyqtyǵy máselesi. Astana men Almatydaǵy aqyly turaq júıeleri arqyly jyl saıyn mıllıardtaǵan teńge jınalady, biraq bul qarajattyń qalaı bólinetini nemese bıýdjetke qanshasy túsetini týraly derekter joq», - dep qosty májilismen.
Depýtattyń málimdeýinshe, azamattar bul qarajattyń abattandyrý nemese qala kórkin jaqsartý túrinde qaıtarylyp jatqanyn kórip otyrǵan joq.
«Eger operatorlar qoǵamdyq keńistikterdi (turaqtar soǵan jatady) basqarý quqyǵyna ıe bolsa, demek, qoǵam aldynda ashyq bolyp, azamattardyń quqyqtaryn qurmetteýge mindetti. Burynǵy jyldary Eski Qazaqstandaǵy sybaılas jemqorlyq janjaldarynyń biri dál osy aqyly turaqtar bolǵan. Osyǵan baılanysty, «Aq jol» fraksııasy árbir paıdalanýshyǵa jeńildikpen eki turaq mekenjaıyn taǵaıyndaý qajet dep sanaıdy: turǵylyqty jerinde táýlik boıǵy jáne jumys ýaqytynda jumys ornyndaǵy turaq. «QazAvtoJol» AQ qala mańyndaǵy aýyldardyń turǵyndarynyń aqyly joldar arqyly kúndelikti qalaǵa jumysqa barýy úshin osy eń tómengi baǵamen tóleý tásilin qoldanǵan», - dep mysal keltirdi depýtat.
Fraksııanyń pikirinshe, turaq tólemderiniń osyǵan uqsas mehanızmi tarıfterdi áldeqaıda ádil etedi.
«Sondaı-aq, árbir turaq aımaǵy qolma-qol aqshany qosa alǵanda, barlyq tólem túrlerin qabyldaıtyn turaq parkomattarymen jáne beınebaqylaý kameralarymen jabdyqtalýy kerek dep sanaımyz. Qyzmet úshin aqy tólegen kezde turǵyndar kóliginiń tek oryn alyp qana qoımaı, sonymen qatar baqylaýda ekendigine senimdi bolýy kerek», - dep atap ótti partııa múshesi.
Sonymen qatar, «Aq jol» fraksııasy aqyly turaq operatorlary men ákimdikter (sonyń ishinde, «Almaty turaq» MKK jáne «Astana turaq» JShS) arasyndaǵy kelisimderiniń sharttaryn jarııa etýdi jáne olardyń qyzmetine aýdıt júrgizýdi usyndy.
«Eger bul kelisimsharttar qala úshin tıimsiz bolsa, negizgi paıda jeke bireýdiń qaltasyna emes, qala bıýdjetine túsetindeı etip olardyń sharttaryn qaıta qaraý kerek. Qarjylyq eseptiliktiń máslıhattarda jáne baspasózde turaqty jarııa etilýin qamtamasyz etý qajet», - dep talap etti Nuraldınov.
