Foto: shyndyq.kz
Turǵyndardyń jartysynan astamy (51,1%) ChatGPT, Google Gemini, Midjourney jáne basqa da jasandy ıntellekt tehnologııalaryn qoldanady.
Jasandy ıntellektini eń belsendi qoldanatyndar jastar: 18-29 jas aralyǵyndaǵy respondentterdiń 76,2%-y jasandy ıntellekt servısterin paıdalanady. 30-45 jasta bul kórsetkish 57,1%-ǵa deıin tómendeıdi. Jas ulǵaıǵan saıyn tehnologııany qoldaný deńgeıi birtindep azaıady: 46-60 jas tobynda 37,5%, al 61 jastan asqan azamattar arasynda – 16,6%.
Jastar mundaı sıfrlyq quraldardy kóbine oqý úrdisine jáne ózin-ózi damytý úshin (48,7%), sondaı-aq mátindermen jumys isteýge (44,2%) paıdalanady. Orta jastaǵy respondentterdiń negizgi suranystary da osy baǵyttarmen sáıkes keledi: bilim alý jáne mátindik mindetter basty qajettilikterdiń qatarynda tur. Al 61 jastan asqan azamattar úshin jasandy ıntellekt servısteri kóbine aqparat izdeýdiń quralyna aınalǵan: bul toptyń 40,8%-y JI eń aldymen qarapaıym izdeý júıesi retinde qoldanady.
Genderlik jáne áleýmettik-demografııalyq aıyrmashylyqtar da aıqyn baıqalady. Áıelder sıfrlyq servısterdi erlerge qaraǵanda jıi qoldanady (54,6% jáne 46,6%). Sondaı-aq qala turǵyndary aýyldyq jerlermen salystyrǵanda jasandy ıntellektti belsendirek paıdalanady: tıisinshe 53,2% jáne 47,9%. Bul aıyrmashylyq kóbine qalalardaǵy sıfrlyq ınfraqurylymnyń keńirek qoljetimdiligimen túsindiriledi.
Bilim deńgeıi de sıfrlyq quraldardy qoldanýdaǵy mańyzdy faktorlardyń biri. Joǵary bilimdi respondentter (64,2%) men orta bilimdi azamattar (37,7%) arasyndaǵy alshaqtyq 1,7 esege deıin jetedi. Bul jańa tehnologııalardy meńgerý úshin bilim men daıyndyqtyń sheshýshi rólin kórsetedi. Sondaı-aq bilim deńgeıi men sıfrlyq quzyrettilik arasyndaǵy baılanys ta aıqyn kórinedi: bilim deńgeıi joǵarylaǵan saıyn zamanaýı tehnologııalardy kúndelikti ómirge engizýge degen daıyndyq ta arta túsedi.
Aıta ketelik, áleýmettanýlyq saýalnama QSZI tapsyrysymen bıylǵy 3 qazan men 5 qarasha aralyǵynda júrgizilip, irikteme kólemi 8 000 respondentti quraǵan. Saýalnamaǵa 17 oblys pen Astana, Almaty, Shymkent qalalarynyń 18 jastan asqan respondentteri qatysqan.
