Maks Raıv tórtkúl álemdegi tańǵajaıyp tabıǵat peızajdaryn sýretke túsirip, óziniń arnaıy saıtyna jarııalaıdy. Onyń ishinde Qazaqstanǵa arnalǵan bólim bar. Bul saıttaǵy sýretterdiń basym kópshiliginde Mańǵystaýdyń týrıstik oryndary kórinis taýypty. Olardyń qatarynda Qarynjaryq oıpaty, Boqty taýy jáne Bozjyra shatqaly bar.
Qarynjaryq oıpaty Mańǵystaý oblysynyń ońtústik-shyǵys bóliginde, Ústirt qoryǵy aýmaǵynda, Qaraqııa aýdanyndaǵy Aqqudyq aýylynan shyǵysqa qaraı 24,4 shaqyrym jáne Basǵurly oıpatynan shyǵysqa qaraı 72,2 shaqyrym jerde ornalasqan. Bul oıpat shamamen 70 mıllıon jyl buryn kúshti výlkandyq jarylys nátıjesinde paıda bolǵan. Ústirttiń ońtústiginen batysqa qaraı aımaqtaǵy eń aýqymdy Kendirli sory jatyr. Sorǵa О́nere jurnaq taýlarynan aǵatyn О́nere bulaǵy quıady.
Boqty taýy teńiz deńgeıinen 8 metr bıiktikte ornalasqan. Shógindi taý trapesııa ólshemimen jáne qabattarynyń san alýan túsimen erekshelenedi. Taý jynystarynyń ártúrli qabaty aıqyn kórinedi, etek jaǵy aq, sarǵysh bolyp bastalyp, qyzǵylt, qyzyl reńge almasady. Al ortańǵy jaǵynan joǵary qaraı birden qońyr túske aýysady. Ol úzdiksiz jel men erozııanyń áserinen búgingi beınesine ıe bolǵan.
Ǵalymdardyń aıtýynsha, Bozjyra shatqaly mıllıondaǵan jyldar buryn taý túzilimderiniń buzylýynan paıda bolǵan. Áktastan quralǵan ústirt landshafty, bıiktigi 250 metrge deıin jetetin jartastarmen erekshelenedi.
