Jańa qyzmet 2023 jyldan beri Saran qalasynda jumys istep kele jatqan №8 psıhologııalyq-pedagogıkalyq túzetý kabıneti bazasynda ashyldy. Buǵan deıin ata-analar erte túzetý kómegin alý úshin jeke ortalyqtarǵa júginýge nemese Qaraǵandyǵa barýǵa májbúr bolatyn.
Kabınet «Dara» qory men «Shevron» kompanııasynyń qoldaýymen júzege asyrylyp jatqan «Múmkindikter ýaqyty» jobasy aıasynda quryldy.
«Bizdiń basty mindetimiz — balanyń damý erekshelikterin der kezinde baıqap, ata-analardyń alańdaýshylyqtan senimdilikke qaraı jol tabýyna kómektesý. Qyzmettiń ashylýy – qaladaǵy ınklıýzıvti bilim berý júıesi úshin mańyzdy qadam, óıtkeni endi eń kishkentaı balalar da kásibı qoldaýdy ýaqytyly ala alady», deıdi №8 TPPK basshysy Quralaı Qulmaǵambetova.
Sabaq ótkizý úshin jaıly damytýshy orta jasaqtaldy: ǵımarat demeýshilik kómektiń esebinen jóndelip, qajetti jabdyqtarmen qamtamasyz etildi. Bólme bes aımaqqa bólingen: tanymdyq, qımyl-qozǵalys, kommýnıkatıvtik, sondaı-aq óz-ózine qyzmet kórsetý jáne áleýmettik ózara árekettesý aımaqtary. Mundaı tásil ár balaǵa jeke marshrýt quryp, qajetti daǵdylardy qalyptastyrýǵa múmkindik beredi.
Kabınet tolyqqandy jumysyn jańa jyldan bastaıdy. Eki transdıssıplınarlyq maman daıarlyqtan ótip jatyr jáne logopedııa, defektologııa jáne psıhologııa baǵyttary boıynsha sabaq júrgizetin bolady. Eger ata-analar balasynyń sóıleýi keshigýin, qarym-qatynastaǵy qıyndyqtardy, uıqynyń buzylýyn nemese damýdaǵy ózge de kesheýildeýdi baıqasa, bul jerge joldamasyz kele alady. Qyzmetterdiń barlyǵy tegin usynylady.
«Dara» qorynyń «Erte qoldaý» jobasynyń jetekshisi Aıgúl Tabergenova mundaı qyzmetter tıimdiligi dáleldengen zamanaýı tásildi engizetinin aıtady: ol balanyń damýyna asa mańyzdy kezeńde áser etip, qoǵamǵa beıimdelýine yqpal etedi ári ata-analardy qoldaıdy.
«Múmkindikter ýaqyty» jobasy Qazaqstanda ekinshi jyl júzege asyrylyp keledi. Alǵashqy erte qoldaý kabınetteri Qaraǵandy men Shahtınskide ashylǵan. 2026 jylǵa deıin mundaı qyzmetterdi Qaraǵandy oblysyndaǵy barlyq TPPK men ońaltý ortalyqtarynda qurý josparlanyp otyr.
