Pavlodar oblysynyń astyq ósirýshileri jıyn-terindi joǵary nátıjemen aıaqtap jatyr. Bıyl taǵy da rekordtyq astyq jınaldy. Dıqandar 836,8 myń gektar alqaptan 1 mln 105,8 myń tonna dándi daqyl jınap, qambaǵa quıyp jatyr. Ortasha ónimdilik gektaryna 13,2 sentnerdi kórsetti.
– Aýyl sharýashylyǵy daqyldarynan eń joǵary ónimdilik kartoptan tústi – gektarynan 296 tonna, sondaı-aq gektarynan 13,7 sentner bıdaı, 10,9 sentner qaraqumyq jınaldy. Dıqandar qazirdiń ózinde 357 myń tonnadan astam bıdaıdy Tájikstan, О́zbekstan, Aýǵanstan, Qyrǵyzstan, Túrikmenstan, Ázerbaıjan memleketterine eksporttady, – deıdi óńirlik aýyl sharýashylyǵy basqarmasynyń basshysy Ádil Isın.
Kartop daqyly 30,2 myń gektardan jınalyp, jalpy kólemi 894,8 myń tonna ónim qambalarǵa quıylǵan. Pavlodar kartoby sapasymen erekshelenedi ári elimizben qatar, kórshiles memleketterde joǵary baǵalanady. Jergilikti fermerlerdiń ónimin qazirdiń ózinde syrt elderden satyp alyp jatqandar bar.
– 88 534,8 tonna kartop syrtqa eksporttaldy. Onyń ishinde negizgi eksporttaýshy el – О́zbekstan, olar 85,9 myń tonna kartop satyp aldy. Al Reseıge 1512 tonna, Túrikmenstanǵa 1020 tonna, Qyrǵyzstanǵa 22 tonna jóneltildi, – dep qosty basqarma basshysy.
Oblystaǵy egin sharýashylyǵyn qoldaýǵa jalpy somasy 6,1 mlrd teńge sýbsıdııa bólingen. Qarajat mıneraldy tyńaıtqyshtar men pestısıdterdiń, aýyl sharýashylyǵy taýaryn óndirýshilerge sý jetkizý qyzmetiniń qunyn sýbsıdııalaýǵa, basymdy ósimdik sharýashylyǵyn damytýdy sýbsıdııalaýǵa, tuqym sharýashylyǵyn damytýdy qoldaýǵa baǵyttalǵan. Qazir egin sharýashylyǵyn sýbsıdııalaýǵa qosymsha bıýdjettik qajettilik 7,98 mlrd teńgeni qurap otyr.
Pavlodar oblysy
