«Búgin – biz úshin tarıhı ári qýanyshty kún. Áýlıeata jerinde jańa fýtbol dáýiriniń bastalýyn birge kýá bolyp otyrmyz. Jańa nysan jáı ǵımarat emes, bolashaq chempıondardyń ordasy, el namysyn álemdik arenalarda abyroımen qorǵaıtyn jańa býyn fýtbolshylardyń jolyn ashatyn mańyzdy qadam.
Bizdiń óńir – qazaq fýtbolynyń qaınar bulaǵy. Osynda ósip, talaı jankúıerdiń júregin jaýlaǵan dańqty sportshylardyń esimi biz úshin zor maqtanysh, keıingi tolqynǵa úlgi. Búgin kapsýlany saltanatty túrde ornalastyrý – alda kútken úlken jetistikterdiń nyshany. Bul akademııadan el senimin arqalaıtyn daryndy, talapty jas fýtbolshylar ósip shyǵatynyna kámil senemiz. Jańa akademııa qazaq fýtbolyna tyń serpin berip, bizdi jańa belesterge bastaı bersin», deıdi Erbol Qarashókeev.
Qazaqstan fýtbol federasııasynyń Bas hatshysy Davıd Lorııa jáne «Halyk» qaıyrymdylyq qorynyń atqarýshy dırektory Ǵalymbek Jaqsylyqov jańa akademııanyń qazaq fýtbolyn damytýdaǵy róline týraly óz oılarymen bólisti. Sondaı-aq fýtbol ardageri Georgıı Hýtıdı men «Taraz» fýtbol klýbynyń túlegi, belgili fýtbolshy Nurken Mázbaev jobany iske asyrýǵa atsalysyp júrgen azamattarǵa óz alǵys aıtty
Quny shamamen 3,5 mlrd teńgeni quraıtyn fýtbol akademııasynda jasóspirimderdiń kásibı ósýi men damýyna erekshe nazar aýdarylmaq. Bul úshin zamanaýı materıaldyq baza jasaqtalyp, tájirıbeli jattyqtyrýshylar jumys isteıdi, al oqý-jattyǵý prosesinde ǵylymı negizdelgen ádistemeler qoldanylmaq. Jas fýtbolshylardyń jaıly ómir súrýi úshin 100 oryndyq jataqhana salý josparlanyp otyr. Akademııa 2027 jyly paıdalanýǵa beriledi dep kútilýde.
