foto: Erlan Álimhanovtyń jeke arhıvi
«MEGADRONE360» dep atalatyn drondy jasaýǵa shamamen eki jyl ýaqyt ketken, jáne ol tolyqtaı AQSh-ta ázirlengen. Nátıjesinde joba dron tehnologııalary salasyndaǵy 200-den astam amerıkalyq kompanııamen básekede fınalǵa ótti.
Erlan Álimhanovtyń aıtýynsha, dronynyń biregeıligi onyń modýldik qurylymynda jáne 360 gradýsqa aınalatyn platformasynda. Mundaı múmkindik drondy áskerı de, azamattyq ta salalarda paıdalanýǵa jol ashady. Qurylymy tótenshe jaǵdaılarǵa arnalǵan ártúrli modýlderdi ornatýǵa múmkindik beredi. Mysaly, adamdardy qutqarý jáne evakýasııalaý kezinde, áýedegi aınalmaly projektor retinde, dári-dármek jetkizýge, júk tasymaldaýǵa nemese órt sóndirýge qoldanýǵa bolady. О́rt kezinde modýldik platforma qurǵaq untaqty hımııalyq órt sóndirý zattaryn atqylaıtyn mehanızmmen jabdyqtalǵan.
Dronnyń qoldaný salasy óte keń: otshashý ushyrýdan bastap aýyr beınekamera ornatýǵa deıin.
Qazirgi ýaqytta onyń fýnksıonaldyǵyn keńeıtý baǵytynda jumystar júrgizilip jatyr. Sonyń ishinde mobıldi kún elektr stansııasyn ázirleý jáne jermen júretin robot rejımin qosý jospary bar.
«Amerıka qarýlaný jaǵynan álemdegi jetekshi el. Bizdiń qatysýymyz jáne kompanııamyzdyń TOP-10 fınalıst qataryna enýi men úshin ǵana emes, búkil Qazaqstan úshin úlken jetistik. Jobamdy tanystyrý barysynda meniń Qazaqstannan shyqqanymdy erekshe atap óttim. Amerıkalyqtar bizdiń elde de joǵary tehnologııalar ındýstrııasy damyp jatqanyn bilsin», dedi Erlan Álimhanov.
Erlan Álimhanov Shyǵys Qazaqstan oblysynyń Lenınogorsk qalasynda dúnıege kelgen, búkil ómirin Almatyda ótkizgen. Qazaq aýylsharýashylyq ınstıtýtyn ınjener-mehanık mamandyǵy boıynsha aıaqtap, kásibı jolyn ónerkásiptik dızaınǵa arnaǵan.
2021 jyly AQSh-tyń talanttar vızasyna (EB-1A) ótinim berip, keıin Kalıfornııa shtatynyń Frımont qalasyna qonys aýdarǵan. Drondarmen aınalysýdan bólek, AQSh-ta halyq tutynatyn taýarlardyń 3D-dızaıneri bolyp jumys isteıdi.
