Foto: Aqorda
Erlan Qarın óziniń maqalasynda aıtqandaı, keıingi jyldary elimizde oryn alǵan saıası ózgerister bir nárseni anyq baıqatty: reformalar joǵary jaqtyń pármenimen emes, kerisinshe keń aýqymdy qoǵamdyq dıalog arqyly qalyptasady. Sonyń nátıjesinde el turǵyndarynyń, azamattyq qoǵam ınstıtýttarynyń, sarapshylardyń birlesken bastamalary memlekettik jańǵyrtýdyń mańyzdy bóligine aınaldy. Túptep kelgende, bul da qoǵamdaǵy jańa mádenıettiń, jańa qundylyqtyń qalyptasyp jatqanyn ańǵartady.
«Búgingi saıasattyń basty ereksheligi – ótken jyldardyń tıimsiz tájirıbesinen alystaý. Buǵan deıin memlekettik organdar jyldam nátıje beretin PR-tásilderge umtyldy. Kórer kózge áserli, biraq tıimsiz sheshimderge basymdyq berildi. Bir kezderi bılik te, qoǵam da jyldam nátıje beretin jumystarmen áýestendi. Jurt aldynda jarqyratyp kórsetip, tez esep berý ádeti qalyptasty. Sol tásil memlekettik basqarý júıesine de, qoǵamdyq psıhologııaǵa da dendep endi. Esesine kózge kórinbeıtin, uzaq merzimge arnalǵan sharýalar tasada qalyp qoıdy», dedi Memlekettik keńesshi.
Erlan Tynymbaıulynyń sózinshe, qazir júıelilikke, praktıkalyq tıimdilik pen turaqty nátıjege basymdyq berilgen. Búginde memleket ınfraqurylym salý, áleýmettik salany jańǵyrtý, azamattarǵa jaıly ómir syılaý sekildi naqty ári júıeli mindetterdi oryndap otyr. Nátıjesi de kóńilge qonymdy.
«Keıingi bes jylda Qazaqstannyń ishki jalpy ónimi eki ese ósti. Jan basyna shaqqandaǵy ishki jalpy ónimniń kólemi 14 myń dollardan asty. Shaǵyn jáne orta bıznes sýbektileriniń sany 1,5 ese ulǵaıdy.
Keıingi bes jylda 1 200 mektep paıdalanýǵa berildi. Keıingi úsh jylda densaýlyq saqtaý salasynda 900 nysan el ıgiligine qyzmet ete bastady. Azamattardyń ortasha ómir súrýi 75 jasqa deıin uzardy.
Turǵyn úı qurylysynyń kólemi 19 mln sharshy metrge jetti. 2,4 myń shaqyrym avtomobıl joly, 880 shaqyrym temirjol salyndy. 1 980 óndiris nysany iske qosyldy», dedi E.Qarın.
Memlekettik keńesshiniń pikirinshe, jarqyn da jyldam «jetistikterge» boıy úırengender mundaı nátıjelerdi kózge ilmeıdi, árıne. Shyn máninde, bulardyń bári – júıeli túrde júzege asyrylyp jatqan jumystar.
«Tek, biz burynǵydaı jarqyrata kórsetip, jappaı jarnamalaýdan tyıyldyq. Jarnamasyz, uransyz, kerisinshe júıeli qadamdar men naqty tásilder arqyly júzege asyrylyp jatqan kúndelikti jumystar damýǵa bastaıdy, halyqtyń ál-aýqatyn arttyrady.
Dál osyndaı tásilder ıdeologııa salasynda da qoldanylyp keledi. Ishki saıasat ásireleýsiz, kózboıaýshylyqsyz rettelip otyr. Jasampazdyq qundylyqtary ornyǵýda. Zańǵa baǵyný jáne qoǵamdyq yntymaqtastyq mádenıeti nyǵaıa tústi. Azamattyq qoǵam, balalar quqyǵyn qorǵaý, eskertkish taqtalar men rámizdik keńistik máselelerine erekshe kóńil bólemiz.
Memleketimiz júıeli ári tıimdi áreket baǵytyn ustanyp otyr. Túrli salada qordalanyp qalǵan máselelerdi jedel rettep, turaqty qundylyqtar men ınstıtýsıonaldyq negizderdi qalyptastyrý kózdelgen. Qabyldanyp jatqan sheshimder de ýaqytsha áserge emes, azamattardyń múddesi men ulttyq strategııalyq basymdyqtarǵa negizdelgen. Bul – salmaqty saıasattyń qaǵıdattary», dep túıindeıdi Memlekettik keńesshi Erlan Qarın.
