Foto: Aqorda
«Bárińizge belgili, eldegi ózgeristerdiń arqasynda memlekettik qyzmetke múlde jańa adamdar kelip jatyr. Osy oraıda, Prezıdenttik jastar kadrlyq rezervin erekshe atap ótken jón. Rezervke qosylýǵa ótinish bergen 30 myńǵa jýyq úmitkerdiń ishinen 450 adam iriktelip alyndy. Olardyń 72%-y basshylyq qyzmetke taǵaıyndaldy.
Kadrlar quramyn jańartý úderisi bıliktiń búkil tarmaǵynda jáne barlyq deńgeıde júrgizilip jatyr. Bul – ýaqyt talaby. Biraq osyndaı jaýapty jumysta saıası naýqanshyldyqqa jol bermeý kerek. Eń aldymen, tıimdi usynys aıtyp, paıdaly bastamalar kóteretin, batyl sheshim qabyldaı alatyn azamattardy, ıaǵnı kásibı turǵydan bilikti mamandardy memlekettik qyzmetke kóptep tartý qajet. Biz osy mańyzdy jumysty jalǵastyra beremiz», dedi Qasym-Jomart Toqaev.
Prezıdent aýyldardyń damýyn árdaıym aldyńǵy qatarǵa qoıatyny belgili. Aıta keteıik, Q.Toqaevtyń alǵashqy Jarlyǵy aýyldy damytýǵa arnalǵan edi.
«Aýyl – tól órkenıetimizdiń altyn qazyǵy. Aýyldy órkendetý – barshaǵa ortaq paryz. Memleket bul máselege erekshe jaýapkershilikpen qaraıdy. О́zderińiz bilesizder, 2022 jyly halyqqa usynǵan saılaý aldyndaǵy baǵdarlamada aýyl máselesine aıryqsha nazar aýdardym.
Alǵashqy Jarlyǵym da aýyldy damytýǵa arnaldy. Soǵan sáıkes Qazaqstan Respýblıkasynyń aýyldyq aýmaqtaryn damytýdyń 2023-2027 jyldarǵa arnalǵan tujyrymdamasy ázirlendi.
Qazirgi tańda osy qujatqa saı naqty jumys atqarylyp jatyr. Jýyrda ǵana Aýyl eńbekkerleriniń ekinshi forýmyn ótkizip, osy saladaǵy ózekti máselelerdi qaradyq. Al búgin aýyl-aımaqtardyń damý baǵdaryn aıqyndaımyz. Bul – memlekettiń aldynda turǵan strategııalyq mindettiń biri», dedi Memleket basshysy.
