Konferensııanyń maqsaty – bıologııalyq qaýipsizdik salasyndaǵy ózekti máselelerdi talqylaý, jańa qaýipterge qarsy ǵylymı negizdelgen tásilderdi usyný jáne halyqaralyq yntymaqtastyqty nyǵaıtý. Plenarlyq otyrysta memlekettik organdardyń ókilderi, halyqaralyq uıymdar men ǵylymı-zertteý ınstıtýttarynyń mamandary baıandama jasady.
Bas demeýshiler: Zalma LTD.,Boehringer Ingelheim
Baǵdarlama 4 negizgi seksııany qamtydy. Onda epıdemıologııalyq jáne epızootııalyq jaǵdaıdy, syrtqy jáne basym ishki bıologııalyq qaýip kózderin monıtorıngileý, juqpaly aýrýlar qozdyrǵyshtaryn anyqtaýǵa arnalǵan dıagnostıkalyq quraldardy ázirleýdiń zamanaýı tásilderi, ınfeksııalyq aýrýlarǵa qarsy ımmýnobıologııalyq preparattardy jasaýdyń tehnologııalyq trendteri, sondaı-aq mıkroorganızmderdiń dárige tózimdilik máseleleri talqylandy. Barlyǵy 70-ten astam ǵylymı jumys usynyldy.
Spıkerler sońǵy jyldary álemde ınfeksııalyq aýrýlardyń taralýy, jańa patogenderdiń paıda bolýy, antıbıotıkterge tózimdi shtamdardyń kóbeıýi jahandyq qaýipsizdikke tóngen qater ekenin atap ótti. Osyǵan baılanysty elimizde 2023 jyldan júzege asyrylyp jatqan bıologııalyq qaýipsizdikti qamtamasyz etý sharalaryn jetildirýdiń ǵylymı-tehnıkalyq baǵdarlamasynyń nátıjeleri tanystyryldy. Baǵdarlama sheńberinde birqatar jańa dıagnostıkalyq jáne profılaktıkalyq quraldar ázirlenip, qaýipti ınfeksııalardyń taralý atlasy daıyndaldy.
Sonymen birge «Bıologııalyq qaýipsizdik» konsorsıýmynyń ǵylymı ónimderi usynylǵan kórme uıymdastyryldy. Qatysýshylar otandyq ǵylymı ázirlemelerdiń óndiristik deńgeıde qoldanýǵa daıyn ekenin atap ótti.
Halyqaralyq sarapshylar bıologııalyq qaýipsizdik salasynda ǵylymı uıymdar, ýnıversıtetter men jetekshi zerthanalar arasyndaǵy seriktestiktiń mańyzyn erekshe atap ótti. Jas zertteýshilerdiń halyqaralyq tájirıbe almasýyna jaǵdaı jasaý qajettiligi de kóterildi.
Osylaısha, konferensııa ǵylymı yntymaqtastyqty keńeıtýge, jańa kásibı baılanystar ornatýǵa jáne Qazaqstannyń bıologııalyq qaýipsizdik júıesin damytýǵa mańyzdy úles qosty.
