Bul kún óner súıer qaýym úshin aıryqsha mańyzǵa ıe. О́ıtkeni sahna tórinde Qaırat Áýkenulynyń jarqyn shyǵarmashylyq jolyn jalǵaǵan talanttar bas qosyp, ulttyq ónerdiń jańa tynysyn, jańarǵan úni men máńgilik sánin pash etti. Keshke qatysýshylar óner ıesiniń ánshilik mektebi men ustazdyq jolyna degen qurmetin óner arqyly órnektep, rýhanı sabaqtastyqtyń mańyzyn aıqyn kórsetti.
Qaırat Baıbosynov – sırek daýys ıesi, ulttyq án ónerindegi dara stıldiń, shynaıy sahnalyq mádenıettiń, tereń bolmysty oryndaýshylyqtyń sımvoly. Onyń oryndaýyndaǵy «Balqadısha», «Qyzyl asyq», «Aǵash aıaq», «Taý ishinde», «Kók ala taı» syndy dástúrli klassıkalyq týyndylar talaı býynnyń júregine jol taýyp, ulttyq mýzykaǵa degen súıispenshiligin oıatty. Ustazdyq jolynda qanshama shákirt tárbıelep, ónerdi kemeldendirýge qosqan eńbegi de ushan-teńiz. Búginde ánshiniń shákirtteri eldiń túkpir-túkpirinde ǵana emes, shetel sahnalarynda da qazaq án ónerin keńinen nasıhattap júr.
«Syr sandyq» keshiniń baǵdarlamasy mazmun baılyǵy men kórkemdik kelisimine saı erekshe daıyndalǵan. Kúıshi-kompozıtor Ahat Baıbosynov óz shyǵarmalarymen kórermenge qazaq kúıleriniń tereń fılosofııasyn sezindirse, dástúrli mýzykalyq óner fakýltetiniń ustazdary men ulttyq ónerdiń qońyr sazyn, názik ıirimderin pash etti. Stýdenttik halyq aspaptar orkestri (dırıjery – Dáýren Ǵylymov) orkestrlik oryndaýdyń jańa tynysyn sezdirip, dombyra men qobyzdyń, sybyzǵy men sherterdiń únin sheber úılestirdi. Al Kúlásh Baıseıitova atyndaǵy QazUО́Ý aralas hory (hormeıster – Olga Krıajevskıh) keshke saltanat berip, kóp daýysty oryndaýdyń ulttyq boıaýyn sátti ashty. Halyqaralyq baıqaýlardyń laýreaty, «Vokaldyq óner» kafedrasynyń magıstranty Aıgerim Temirbekovanyń óneri de kórermenge erekshe áser syılaǵany sózsiz. Jas talanttyń oryndaýyndaǵy vokaldyq týyndylar sahna kórkin keńeıtip, keshtiń emosııalyq tynysyn tamasha túıindedi.
«Syr sandyq» – dástúrli ánshiniń tek mereıtoılyq keshi ǵana emes, ulttyq ónerdiń shejiresin paraqtap, dástúr sabaqtastyǵyn sezindirgen, qazaq mýzykasynyń bıik rýhyn dáriptegen mádenı oqıǵa bolǵany anyq. Bul konsert ónerpazdar men kórermen arasyndaǵy rýhanı baılanysty tereńdetip, ónerdiń máńgilik qudiretin aıqyndaı tústi. Toqeterin túıgende, aıtýly án keshi qazaqtyń dástúrli án ónerin jańa bıikke kótergen, ulttyq vokal mektebiniń qalyptasýyna ólsheýsiz úles qosqan maıtalman ónerpazdyń shyǵarmashylyq jolyna jasalǵan shynaıy taǵzym boldy desek, artyq aıtqandyǵymyz emes.
