Assambleıa – birlikti bekemdeıtin qurylym

Keshe Memlekettik hatshy Gúlshara Ábdiqalyqova Ońtústik Qazaqstan oblysyna jumys saparymen keldi. Memlekettik hatshyǵa oblys ákimi Asqar Myrzahmetov óńirde atqarylyp jatqan jumystar jaıly baıandady. Úsh mıllıonǵa tarta halqy bar Oń­tústikte densaýlyq saqtaý jáne bi­lim berý nysandaryna qajettilik asa se­zi­letin. Sońǵy jyldary memlekettiń já­ne oblys ákimdiginiń kúsh salýymen bul qıyn túıinder sheshile bastaǵan. Shym­kent qalasyndaǵy jańadan salynǵan 270 oryndyq №1 qalalyq balalar aýrýhanasynyń saltanatty ashylýyna Memlekettik hatshy G. Ábdiqalyqova qatysty. Aýrýhanada 15 jasqa deıingi 10 myńnan astam bala stasıonarlyq em ala alady. Medısına qyzmetkerleriniń jumysyna tabys tilegen Memlekettik hatshy «Naýryz» alańynda salynǵan «Ádet-ǵuryp jáne salt-dástúr» orta­lyǵynda oblystaǵy etnomádenı bir­lestikter ókilderimen kezdesý ótkizdi. Júzdesý barysynda «Qazaqstan halqy Assambleıasy – 20 izgi is» respýblıkalyq estafetasynyń sheńberinde pedagogıka ǵylymdarynyń doktory, professor, Qazaqstan Respýblıkasy Gýmanıtarlyq ǵylymdar akademııasynyń akademıgi, oblystyq assambleıa janyndaǵy ǵy­lymı-saraptamalyq toptyń jetekshisi A.Qa­lybekovanyń «Qazaq halyq tárbıesiniń asyl murasy» jáne «Qazaq halyq peda­gogıkasynyń teorııalyq negizderi» ki­taptaryn ortalyqtyń depozıtarııine tapsyrý rásimi ótti. Gúlshara Ábdiqalyqova Ádet-ǵuryp jáne salt-dástúr ortalyǵynda oblystyń etnomádenı birlestikteri ókilderimen ótkizgen kezdesýinde Qazaqstan halqy Assambleıasy jylyn ótkizýdiń qoǵamdyq-saıası máni joǵary ekenin aıtty. Memlekettik hatshy barlyq is-sharalar «Meniń elim – Máńgilik El» atty bas­ty ıdeıany, beıbitshilikti, qoǵamdyq kelisim men halyqtyń birligin nyǵaıtýǵa baǵyttalýǵa tıis dep atap kórsetti. «Eldigimizdi bekitip, halyq rýhyn asqaqtatatyn mereıli oqıǵalarǵa toly Qazaqstan halqy Assambleıasy jylynyń Qazaqstan halqy úshin, onyń ishinde eldegi birlikti bekemdeýge eńbek sińirip júrgen sizder úshin máni men mańyzy erekshe dep bilemin. Qazaqstan halqy Assambleıasy beıbitshilik pen kelisimdi, turaqtylyq pen tatýlyqty saqtap, damytýdyń biregeı tetigi – Táýelsizdikke, damýǵa tirek bolǵan El birliginiń eń basty tutqasy. Sondyqtan da, Assambleıa jyly el tarıhynda naqty nátıjeli istermen, tolymdy jetistiktermen órnektelgen belesti kezeń bolyp qalýy tıis. Búgingi jıynda Ońtústik Qazaqstan oblysynda turatyn túrli etnostar ókilderi retinde ózderińizben kezdese otyryp, halyqtyń birligin odan ári arttyrý baǵytynda birlesip atqaratyn jumystarymyzdy saralap alsaq degen oıy­myz bar», dep sózin sabaqtaǵan Gúlshara Naýshaqyzy 100-ge jýyq etnostardyń basyn biriktirip, bir úıdiń balasyndaı, bir qoldyń salasyndaı yntymaqqa uıyǵan Ońtústiktiń qazaq úshin qut meken, altyn besik ekendigin aıtty. Qazaqstan halqy Assambleıasynyń sımvoly – «Taıqazannyń» kıeli Túrkistannan Astanaǵa attandyrylýynyń el birligi úshin jaqsy joralǵy ekendigin jetkizdi. Qazaqstan halqy Assambleıasynyń túp qazyǵy jalpyhalyqtyq «Máńgilik El» ıdeıasy ekendigin aıtqan Memlekettik hatshy Elbasynyń Assambleıa arqyly birlikti nyǵaıtý tapsyrmalarynyń Ońtústikte jaqsy oryndalyp jatqandyǵyn atap ótti. Budan keıin Memlekettik hatshy Ońtústik Qazaqstan oblystyq Assambleıasynyń iske asyrýǵa tıis jeti baǵytyn naqtylap berdi. Qazaqstan halqy Assambleıasy Tóraǵa­synyń orynbasary Eraly Toǵjanov Mem­le­kettik hatshynyń sóılegen sózin ári qaraı damytty. Júzdegen ulttar men ulystardyń basyn biriktirgen Assambleıanyń jumys tásiline Germanııa, Qytaı sııaqty irgeli elderdiń qyzyǵýshylyq tanytqanyn aıtqan Eraly Luqpanuly Assambleıanyń Memleket basshysynyń tapsyrmalaryn oryndaýda bir jaǵadan bas, bir jeńnen qol shyǵaratyndaı birlikte bolý qajettigin naqtylady. Kezdesý barysynda oblys ákiminiń oryn­basary Erlan Aıtahanov 2014 jylǵy jumys­tyń negizgi qorytyndylary men Ońtústik Qa­zaqstan oblysy assambleıasynyń jumys jos­parlary men óńirde Qazaqstan halqy As­sambleıasy jylyn ótkizý jóninde baıandady. «Yrys aldy – yntymaq» forýmynyń hatshysy, belgili jazýshy Marhabat Baıǵut oblys ákiminiń uıytqy bolýymen Túrkistanda zııaly qaýym basqosýynyń «Yrys aldy – yntymaq» forýmyna ulasqanyn aımaq ómirimen baılanystyra aıtyp berdi. Jıynda cheshen-ıngýsh etnomádenı ortalyǵynyń tóraǵasy Hasan Basıev qıyn kezeńde óz jurtynan eriksiz kóshirilgen jurttyń qazaqtyń keń qoltyǵynan pana tapqanyn, Qazaqstan – osyndaǵy barlyq ulttar men ulystardyń týǵan Otanyna aınalǵanyn, qandaı kúnde de Elbasynyń qasynda toptasatyndyqtaryn, halyq qalaýy – birlik pen yntymaq ekendigin jetkizdi. Al ózbek etnomádenı ortalyǵy janyndaǵy jas­tar qanatynyń jetekshisi Yqsybaı Mamedov Qazaqstandaǵy barsha etnos ókilderiniń memlekettik til – qazaq tilin bilý qajettigine toqtaldy. «Básekege qabilettiliktiń bir sıpaty – til. Qazaq tilinde sóıleıtindigimnen qaı jerde de ornym bar, jumysym bar. Biz jastar Elbasymyzdyń erekshe qamqorlyǵyn sezinemiz. Biz Elbasymen, elimizben qýattymyz», – dedi. Budan keıin, Memlekettik hatshy jumys sapary aıasynda birqatar nysandardy aralap kórdi. «Qoǵamdyq kelisim» kommýnaldyq memlekettik mekemesine baryp, burynǵy «Qazaqstan» kınoteatryn qaıta qurylymdaý jobasymen tanysty. Sondaı-aq, kezinde apatty jaǵdaıda dep tanylyp, qaıta boı kótergen A.S.Pýshkın atyndaǵy №1 mektep-gımnazııasynda boldy. №6 kolledjdegi dýaldy bilim berý barysymen tanysyp, beıneleý óneri murajaıynyń ashylýyna qatysty. Sapar qorytyndysynda G.Ábdiqalyqova Ońtústik Qazaqstan oblysynyń áıelder qaýymdastyǵy ókilderimen kezdesti. Kezdesý barysynda otbasy-demografııalyq saıasatty damytý máseleleri, «Qazaqstan-2050» Strategııasyn, «Nurly Jol – bolashaqqa bastar jol» atty Jańa Ekonomıkalyq Saıasatty júrgizýge áıelderdiń belsene aralasýy, Qazaqstan Respýblıkasynyń 2006-2016 jyldarǵa arnalǵan genderlik teńdik strategııasyn iske asyrý máseleleri talqylandy. Baqtııar TAIJAN, «Egemen Qazaqstan». Ońtústik Qazaqstan oblysy.