Eńbek jáne halyqty áleýmettik qorǵaý mınıstrliginiń málimetinshe, 2024 jyly 96,9 myńnan astam ótinim qashyqtan qaralǵan. Bul sol jyly múgedektik úshin kýálandyrylǵan azamattardyń jalpy sanynyń 37,4%-yn quraıdy.
Prezıdent Ulttyq qoǵamdyq senim keńesiniń VI otyrysynda múmkindigi shekteýli azamattardyń mekemelerge sabylyp barýyn, artyq qujat jınatý men tikeleı baılanysqa jol berýdi azaıtý qajettigin atap ótken edi.
«Osy tapsyrmany oryndaý maqsatynda QR Eńbek jáne halyqty áleýmettik qorǵaý mınıstrligi Densaýlyq saqtaý men Sıfrlyq damý, ınnovasııalar jáne aeroǵarysh ónerkásibi mınıstrlikterimen birlesip Qazaqstannyń barlyq 20 óńirinde qanatqaqty rejımde medısınalyq-áleýmettik saraptama (budan ári – MÁS) júrgizýdiń syrttaı formaty boıynsha jobany iske asyryp jatyr», delingen habarlamada.
Syrttaı kýálandyrý formatyna kóshý:
- Artyq ákimshilik rásimderdi qysqartady;
- Saraptamalyq sheshimderdiń ashyqtyǵyn arttyrady;
- Áleýmettik qorǵaý qyzmetterin úıden shyqpaı alýǵa múmkindik beredi;
- Qyzmet alýshy men qyzmet kórsetýshi arasyndaǵy tikeleı baılanysty boldyrmaı, sybaılas jemqorlyq táýekelderin tómendetedi.
