«Men árqashan taza sportty qoldaımyn. Muny jaqsy bilesizder. Men taza sportty nasıhattap júrgenimdi de bilesizder. Jańalyqty oqyp tań qalyp otyrmyn. VADA birinshi ret analız alyp bári taza dep edi. Men vıtamınderime de tamaǵyma da eshqandaı ózgeris engizbedim. Ekinshi ret testte nege mundaı bolǵanyn túsinbeı otyrmyn, biz qaıta analız tapsyrýǵa ótinish aıttyq. Jaýabyn kútip otyrmyz!», dep jazdy Jánibek Álimhanuly.
BoxingScene taratqan málimet boıynsha, boksshynyń synamasynan meldonıı anyqtalǵany aıtyldy.
Buǵan deıin WBO jáne IBF tujyrymdary boıynsha orta salmaqtaǵy álem chempıony Jánibek Álimhanulynyń kezekti jekpe-jegi aldyndaǵy dopıng testinen ótpeı qalǵanyn jazǵan edik.
Esterińizge sala keteıik, 6 jeltoqsan kúni Jánibek Álimhanuly úsh belbeý úshin kýbalyq Erıslandı Laraǵa qarsy jekpe-jek ótkizýi tıis bolǵan edi.
