Foto: Aqorda
Svetlana Jaqypova halyqty jumyspen qamtý sharalary týraly aıtty. Búgingi tańda azamattardy jumyspen qamtý boıynsha 2029 jylǵa deıingi jospardyń 83 paıyzy oryndalǵan. Sońǵy bes jylda 2,7 mıllıon adam eńbekke tartyldy. Sapaly jumys oryndaryn kóptep ashý úshin óńirlik jol kartasy men jyl saıynǵy KPI iske asyrylýda.
Memleket basshysyna bıylǵy 10 aıda ataýly áleýmettik kómek alýshylardyń sany 30 paıyzǵa azaıǵany jaıynda aqparat berildi. Nátıjesinde resýrstardy shyn máninde muqtaj jandarǵa qaıta bólý múmkindigi paıda boldy. Qazirgi kezde mundaı kómek túrin 285,1 myń adam aldy. Bul maqsatqa 27,1 mıllıard teńge jumsalady.
Sonymen qatar mınıstr óndiristik jaraqat alý 6,5 paıyzǵa, al kisi ólimine ákelip soǵatyn qaıǵyly oqıǵalar 4,5 paıyzǵa azaıǵanyn málimdedi.
Usynylǵan derekke sáıkes, Áleýmettik qyzmetter portaly arqyly 522 myńnan astam adamǵa qyzmet kórsetilgen, 27 myń azamat ınvataksı kómegine júgingen.
Budan bólek, Prezıdentke bıyl bazalyq zeınetaqy mólsheri eń tómengi kúnkóris deńgeıiniń 70 paıyzyna deıin ulǵaıtylǵany týraly esep berildi. Jyl saıyn ınflıasııa deńgeıine sáıkes ındeksasııalaý júrgiziledi. Jumys berýshi tarapynan tólenetin mindetti zeınetaqy jarnasynyń mólsherlemesi kezeń-kezeńimen ósip, 2028 jylǵa qaraı 5 paıyzǵa jetedi. Jumyspen qamtylǵan halyqtyń 65 paıyzy jınaqtaýshy zeınetaqy qorynyń salymshylary sanalady.
Svetlana Jaqypova Memleket basshysynyń Qazaqstan halqyna arnaǵan Joldaýynda aıtylǵan tapsyrmalarynyń oryndalý barysy jóninde baıandady. Mınıstrlik memlekettik qyzmet kórsetýge arnalǵan Biryńǵaı sıfrlyq platforma qurý boıynsha belsendi jumys júrgizip jatyr. Bul muqtaj azamattarǵa naqty kómek kórsetýge jáne qoldaý sharalarynyń tıimdiligin arttyrýǵa yqpal etedi.
Kezdesý sońynda Memleket basshysy jumyspen qamtý sapasyn jaqsartýǵa, áleýmettik qoldaý tetikterin odan ári sıfrlandyrýǵa, eńbek qatynastaryndaǵy qaýip-qaterlerdiń aldyn alý sharalaryn kúsheıtýge, zeınetaqy júıesin jáne kóshi-qon saıasatyn jetildirýge baǵyttalǵan birqatar tapsyrma berdi.
