Oqý nysanynyń ashylý saltanatynda zaýyttyń atqarýshy dırektory Arǵulan Maıqonov atalǵan jobanyń strategııalyq turǵydan mańyzdy ekenin atap ótti:
«Oqý ortalyǵynyń ashylýy – «Allur» zaýytynyń kadrlyq áleýetin damytýdaǵy taǵy bir mańyzdy qadam. Biz óz qyzmetkerlerimizge zamanaýı, tájirıbege negizdelgen bilim alýǵa jaǵdaı jasap otyrmyz. Sapaly kadr – sapaly ónimniń negizi. Búgin jumysyn bastaǵan oqý-jattyǵý ortalyǵy avtoónerkásip salasynyń eń joǵary talaptaryna saı mamandardy daıarlap shyǵaratyn bolady», dedi A.Maıqonov.
«MSV Boıaý» ortalyǵynda jastar avtomobıl boıaýda iske asyrylatyn boıaýdy jyltyratý, laktaý, mastıka jaǵý daǵdylaryn meńgeredi, sondaı-aq boıaý robotyn basqarýdy úırenedi. Mundaǵy oqý merzimi úırenýshiniń qabiletine qaraı eki aptadan úsh aıǵa deıin sozylady.
«Ortalyqtaǵy oqý-jattyǵý baǵdarlamasy tájirıbege negizdelgen. Munda tyńdaýshylar qarapaıym jáne kúrdeli daǵdylardy meńgeredi, avtomobıl boıaý tehnologııasynyń qyr-syryna qanyǵady. Sabaq barysynda, eń aldymen, tehnıka qaýipsizdigi talaptaryn qatań saqtaý máselesi qadaǵalanady», deıdi oqý ortalyǵynyń sheberleri.
Zaýyt basshysynyń aıtýynsha, kásiporynda sońǵy bir jyl ishinde «MSB qurastyrý» oqý-jattyǵý nysany, sapa mektebi, sondaı-aq, Qostanaı avtomobıl kóligi kolledji janynan ashylǵan quzyret ortalyǵy iske qosylǵan.
Qostanaı oblysy
