Foto: qaz-media.kz
Senat depýtatynyń aıtýynsha, jastardy aýyldyq jerlerdegi densaýlyq saqtaý, bilim berý, mádenıet, sport jáne agroónerkásiptik keshen salalaryna tartý maqsatynda ázirlengen baǵdarlama bir rettik járdemaqy jáne turǵyn úıge arnalǵan jeńildetilgen nesıeler usynyp keledi. Baǵdarlama iske asyrylǵan ýaqyt ishinde 114 myńnan astam maman qoldaý alǵan, shamamen 52 myń adam turǵyn úı máselesin sheshken.
«Alaıda baǵdarlamanyń aýqymyna qaramastan, qatysýshylardyń bir bóligi aýylda 3 jyl jumys isteý jónindegi mindettemesin oryndamaıdy. Tek sońǵy 3 jylda 166 adam kelisim talaptaryn buzǵan, al ótelmegen nesıeler kólemi 784 mln teńgeden asqan.
Búginde halyqtyń 37 paıyzy, ıaǵnı 3 mıllıonnan astam, shamamen 4 mıllıonǵa jýyq adam aýyldyq jerlerde turady. Tek Soltústik Qazaqstan oblysynyń ózinde 2025-2027 jyldarǵa 3 043 maman qajet. 114 myń maman bir rettik tólem alǵanymen, olardyń tek 52 myńy ǵana turǵyn úımen qamtyldy. Al shyn máninde qansha maman aýylda qalyp qoıǵany belgisiz. Olar aqshalaryn alyp, ýaqyt óte kele aýyldan ketip qalady. Járdemaqy mamandardy tartýǵa kómektesedi, biraq olardy turaqty ustap qalýǵa jetkiliksiz», dedi Nurtóre Júsip.
Senator sondaı-aq baǵdarlamaǵa qatysýshylardyń ómir súrý jaǵdaılaryna – jalaqy deńgeıine jáne áleýmettik ınfraqurylymnyń qoljetimdiligine – keshendi taldaý júrgizilmegenin atap ótti.
«Aýyldarda áli de sapaly qyzmetter men turǵyn úıler jetispeıdi, sondyqtan jas mamandar mindetti merzim aıaqtalǵan soń ketip qalady. Buǵan qosa, bıýrokratııa, óńirlerdegi tájirıbe aıyrmashylyǵy jáne oblystardyń baǵdarlamaǵa árkelki qatysýy qosymsha qıyndyqtar týǵyzady», dedi depýtat.
Osyǵan baılanysty N.Júsip anyqtalǵan problemalardy eskere otyryp, baǵdarlamaǵa ózgerister engizýdi surady.
