Bokstan álem chempıonatyn Qazaqstanda ótkizýdi Halyqaralyq ýnıversıtetter sporty federasııasy usynyp otyr. 28 qarasha kúni Qytaıdyń Makao qalasynda Azııa ýnıversıtettik sport federasııasynyń Bas Assambleıasy ótti. Bul jıynǵa Qazaqstan ulttyq stýdentter sport odaǵynyń Prezıdenti Qaırat Zakırıanov ta qatysty. Is-shara aıasynda óńirdegi ýnıversıtettik sportty damytýǵa qatysty negizgi máseleler, yntymaqtastyq strategııalary men Ortalyq Azııadaǵy stýdenttik sport jobalaryn ilgeriletýge baǵyttalǵan jańa bastamalar talqylandy.
Halyqaralyq ýnıversıtetter sporty federasııasynyń Prezıdenti Leons Eder Qazaqstannyń halyqaralyq iri jarystardy uıymdastyrýda tájirıbesi mol ekenin aıtty. 2017 jyly elimizde Búkilálemdik qysqy Ýnıversıada joǵary deńgeıde uıymdastyryldy.
Bokstan stýdentter arasyndaǵy Álem chempıonatyn otandasymyz Gennadıı Golovkın basqaratyn WORLD Boxing halyqaralyq uıymnyń qoldaýymen ótkizýi múmkindigi jan-jaqty qarastyrylyp jatyr.
Sondaı-aq Halyqaralyq ýnıversıtetter sporty federasııasy 2029 jylǵy Búkilálemdik qysqy Ýnıversıada oıyndaryn da Qazaqstanda ekinshi ret ótkizý máselesin kóterdi.
Búgin Almatyda ótken baspasóz máslıhatynda Qaırat Zakırıanov stýdentter arasynda álem chempıonatyn ótkizý mańyzdy ekenin aıtty. «Bul Halyqaralyq ýnıversıtetter sporty federasııasy, basqa da halyqaralyq sport uıymdarynyń elimizge degen senimi joǵary ekenin aıqyndaı túsedi. Sondaı-aq elimizde buǵan deıin de sport túrlerinen álemdik dodalar uıymdastyrylyp júr. Mundaı aýqymdy saıystardy ótkizýge tájirıbemiz de jetkilikti», dedi Q.Zakırıanov. Sondaı-aq ol 2028 jyly Astanada stýdentter arasynda Combat boıynsha Álem chempıonatyn ótkizýge kelissóz júrgizilip jatqanyn da aıtty.
