Foto: Avtordan
Taktıkalyq-saptyq sabaqtar barysynda jeke quram belgilengen ýaqytta jıyn ornyna kelip, qoıylǵan tapsyrmalardy oryndady. Áskerı daǵdylaryn shyńdaǵan sarbazdardyń daıyndyq áreketteri baqylaý toby tarapynan baǵalandy. Jeke quram bólimge tolyq jınalǵannan keıin bólimsheler marsh jasap, belgilengen aýmaqtarda oqý-jattyǵý ótkizdi. Mundaı áskerı jattyǵý sarbazdardyń uıymshyldyǵyn, berilgen tapsyrmany múltiksiz oryndaýshylyǵyn, jedeldik pen úılesimdilikti baıqaý úshin kerek.
Merzimdi áskerı qyzmet atqaryp júrgen qatardaǵy jaýynger Berdııar Qýatov daıyndyq sabaqtary jaıynda bylaı deıdi:
«Men bıyl kóktemde Aqtóbe oblysynan shaqyryldym. Alty aıdyń ishinde áskerı istiń qyr-syryn meńgerdim desem bolady. Apta basynda tekserý dabyly oınap, bárimiz óre túregeldik. Rotalyq kolonnalardy qurý aımaǵyna baryp, birneshe jaýyngerlik normatıvterdi oryndadyq. Sonyń ishinde men úshin este qalǵany – medısınalyq daıyndyq. Biz jaralanǵan jaýyngerlerge alǵashqy kómek kórsettik. Is júzinde evakýasııalaý tásilderin úırendik. Bul bilim tek armııada ǵana emes, keıingi ómirde de qajet qoı. Áskerde men sarbazdyń kez kelgen jaǵdaıǵa daıyn bolý kerek ekenin túsindim. Alǵashqy kómek edel-jedel kórsetilse, bir adamnyń ómirin qutqaryp qalǵanyń. Jaýyngerlik tártipke úıretken osyndaı áskerı bólimde qyzmet etip jatqanym men úshin úlken maqtanysh», dedi ol.
Tekserý barysynda komandırler dalalyq jaǵdaıda taktıkalyq sheshimder qabyldap, jeke quramǵa naqty tapsyrmalar júktedi. Sondaı-aq qarýdy durys qoldanyp, kózdep atý basqa da jaýyngerlik daıarlyq áskerı basshylyq tarapynan erekshe nazarǵa alyndy. Sózsiz mundaı oqý-jattyǵýlar áskerı qyzmetshilerdiń kásibı deńgeıin arttyrady, sonymen qatar brıgada bólimsheleriniń turaqty jaýyngerlik daıyndyqta bolýyn qamtamasyz etedi dedi áskerı sala jetekshileri.
ShYMKENT
