Degenmen óńirlerdi ońtaılandyrý kezinde Semeı Shyǵys Qazaqstan oblysyna qosylyp, arada shırek ǵasyr ótkende uly Abaı esimimen qaıta qurylǵanǵa deıin bul sala toqyrap, stadıondar qańyrap bos qaldy. Memleket basshysy Qasym-Jomart Toqaevtyń Abaı oblysyn qurý týraly sheshiminen keıin oblyspen qatar «Elimaı» komandasy da eńsesin tikteı bastady. Máselen, ótken ǵasyrdyń 90-jyldaryndaǵy «Elimaı» quramy elimizdiń kəsibı fýtbolynda birqatar rekordtar ornatty. Sol ýaqytta Semeı komandasy Qazaqstannyń alǵash úsh dúrkin chempıony atandy (1994, 1995, 1998), bir maýsymda birinshi bolyp (1995) ulttyq birinshiliktiń altynyn, sondaı-aq Qazaqstan Kýbogi men Sýperkýbogin ılendi. Búginde «Elimaı» el birinshiliginiń úzdikteri qatarynda. Súıikti komandasyna degen halyqtyń yqylasy da erekshe. Bıylǵy dúbirli dodalarda ortalyq stadıon jankúıerlerge lyq tolady. Tipti syımaı, aýzy-murnynan shyǵyp qalǵan sátter kóp boldy. Búginde semeılikterge ərbir match úlken merekege aınalady. Eńbektegen baladan eńkeıgen qarııaǵa deıin aıtýly fýtbol oıynyn kútip, kassalarda uzyn-sonar kezekter týdyrady. Sondyqtan da bul jańalyqty estigen semeılikterdiń bórki aspanda qalyqtap júr áli.
Prezıdenttiń qoldaýymen bastalǵan «Abaıǵa qurmet» aksııasy aıasynda elimizdiń birneshe óńiri Semeı qalasyna bir nysannan salyp berýge óz usynystaryn berdi. Mańǵystaý oblysy Dostyq úıiniń irgetasyn qalady. Shymkent qalasy shyǵarmashylyq ortalyǵy men Mádenıet úıin, Túrkistan oblysy kórme ortalyǵyn, Astana qalasy Keleshek mektebin, Aqtóbe oblysy jekpe-jek ortalyǵyn, Pavlodar oblysy ústel tennısi ortalyǵyn, Soltústik Qazaqstan oblysy rámizder alańyn, Qyzylorda oblysy «Anaǵa taǵzym» ortalyǵyn, Batys Qazaqstan oblysy jelilik saıabaq salýdy, Shyǵys Qazaqstan oblysy Ertis jaǵalaýyn abattandyrýdy josparlap otyr. Osyndaı ıgi bastamalar aıasynda, Semeı qalasyna 25 myń oryndyq stadıonnyń qurylysy bastalyp otyr.
Keshe oblys ákimi Berik Ýálı jańa «Smart City» yqshamaýdanyna baryp, stadıonnyń qurylys barysymen tanysty. Qadasyn qaqty.
«Búgin, mine, stadıonnyń qurylys jumystary bastaldy. Osy jumysty báseńdetpeı, jalǵastyrý qajet. Qarjysy kezeń-kezeńimen bólinetin bolady. Bul – semeılikterdiń kópten kútken jańalyǵy. Semeı – qazaq fýtbolynyń otany. Qala turǵyndary fýtboldy jaqsy kóredi. Sol sebepti osyndaı stadıon kerek. Kópten beri aıtylyp júr. Nysan ázirge Astana, Almaty, Aqtóbeden keıingi syıymdylyǵy jaǵynan qurylysy josparlanǵan stadıondardyń arasynda 4-shi oryndy alady. ÝEFA-nyń matchtaryn qabyldaýǵa múmkindik týady, olardyń standarttaryna saı keledi. Bul jańa yqsham aýdanda áli de qanshama nysandardyń qurylysy bastalady. Jaqyn arada mańǵystaýlyqtar alǵash bolyp qorshaý qoıyp, jumystaryn bastaıyn dep otyr. Eń bastysy, Úkimet tarapynan kelisim bar. Qujattar rásimdelgennen keıin jumystar bastalady», dedi aımaq basshysy.
Oblystyq baspasóz qyzmetiniń málimetinshe, «Týǵan jerge týyńdy tik» ınvestısııalyq forýmy aıasynda Semeı qalasy ákimdigi men «KAZ Minerals» toby arasynda memorandým jasalyp, 25 myń kórermenge arnalǵan stadıon salý josparlanǵan. Sonymen qatar atalǵan kompanııa «Elimaı» ftbol klýbyna jan-jaqty demeýshilik jasap keledi. Al stadıonnyń jalpy aýmaǵy – 20 gektar. Qazirgi ýaqytta 25 myń oryndyq stadıonnyń qurylysyn júrgizetin merdiger uıymmen úsh jaqty kelisimshart jasalyp, aýmaq qorshalyp, jerdi qazý, tegisteý jumystary bastaldy.
Jobaǵa sáıkes, aýmaqta asfalt joldar men alańdar qarastyrylǵan. Arhıtektýralyq-josparlaý jáne ınjenerlik-qurylymdyq sheshimderdi ázirleý barysynda aımaqtyń tabıǵı-klımattyq jáne geologııalyq erekshelikteri tolyq eskerildi. Stadıon qurylysy 2 jyldan keıin aıaqtalatyn bolady.
«Qazirgi qazaq fýtbolyna eń keregi – ınfraqurylym. Jańa stadıondar salyp, balalarǵa sapaly akademııalar uıymdastyrylýy kerek. 30 jyldan astam bul jumystar sóz kúıinde qalyp ketti. Prezıdenttiń tapsyrmasynyń arqasynda sońǵy kezderi ilgerileý baıqalady. Semeıde áý basta stadıon 10 myń bolady delingen. Biraq jańa ákim Berik Ýálıdiń bastamasymen syıymdylyǵy 25 myńǵa ulǵaıtyldy. Bul óte durys bastama. Ákim – qazaq fýtbolynyń otany sanalatyn óńir halqynyń ala dopqa degen qyzyǵýshylyǵy joǵary ekenin baıqap otyr. «Elimaı» degen at maǵan qatty unaıdy. Qazaqtyń komandasy ekenin birden baıqatady. Endi komanda atyna saı bolyp, eýrokýbokta sátti óner kórsetse deımin. Stadıon qurylysy ýaqytynda aıaqtalyp, jankúıerlerdiń qýanyshy artady dep úmittenemin», deıdi fýtbol sarapshysy Bek Tóleýov.
Onyń aıtýynsha, «Elimaı» klýbynyń bıylǵy maýsymdaǵy oıynyn ekige bólip qaraýǵa bolady. Komanda tamyzǵa deıin ala-qula oınady. Sosyn Ǵalymjan Kenjebek, Ramazan Orazov ulttyq qurama úzdikteri kelip, eńse tiktedi. Kúzge qaraı «Aqtóbenden» ozyp, eýrokýbokqa joldama aldy. Iаǵnı «Elimaıdyń» bıylǵy maýsymdaǵy nátıjesine 4 degen baǵa qoıýýǵa bolady. Kelesi jylǵy jaýapkershiligi eki ese. Klýb ishki chempıonatta júldege talasý kerek. Sosyn eýrokýbokta joǵary nátıjege umtylýy tıis. Eger osy eki tapsyrmanyń birde-bireýi oryndalmasa, komanda basshylyǵy, bapkeri qyzmetinen ketkeni durys.
Bıyl Qazaqstan Premer‑lıgasynda «Elimaı» maýsymdy jaqsy nátıjemen aıaqtady. Komanda 26 oıynnan soń 14 jeńis, 6 teń, 6 jeńilis kórsetip, týrnır kestesinde 4‑orynǵa ıe boldy. Erekshe aıtar jaıt – 25‑turda «Turandy» 6:3 esebimen jeńýi. Sol jeńis «Elimaıǵa» Eýropa joldamasyna – UEFA Konferensııalar lıgasy irikteý kezeńine qatysý múmkindigin syılady. Osylaısha, «Elimaı» klýby Abaı óńiri úshin tarıhı sátke qol jetkizdi. Sóıtip klýb alǵashqy ret eýrokýbokqa joldama alyp otyr. Jalpy, 2025 jyl klýbtyń alǵa umtylysyn kórsetti. Semeı fýtbolynyń abyroıyn asqaqtatyp, jankúıerlerine kópten jeńis syılady. Al jańa stadıon «Elimaı» fýtbolshylarynyń yntasyn asyryp, jigerin janı túseri sózsiz.
Abaı oblysy
