Sýretterdi túsirgen – Jeńis Ysqabaı
Shyǵarmashylyqqa adaldyqtyń, rýhanııatqa qyzmet etýdiń, jarty ǵasyrlyq eńbektiń laıyqty baǵalanýy retinde qabyldanǵan bul jańalyq teatr ujymyn ǵana emes, tutas Jetisý jurtshylyǵyn erekshe qýanyshqa bóledi. Taldyqorǵan teatrynyń tarıhy 1975 jyldan bastaý alady. Teatr shymyldyǵyn alǵash bolyp Ǵabıt Músirepovtiń «Qozy Kórpesh – Baıan sulý» pesasy ashqan sátten bastap, bul ujym óner áleminde ózindik qoltańbasyn qalyptastyryp, qazaq teatr mádenıetiniń damýyna zor úles qosyp keledi.
Bıyl 50 jyldyǵyn atap ótken óner ordasy osy ýaqyt aralyǵynda júzdegen qoıylym qoıyp, talaı talantty túletip shyǵardy. Almahan Kenjebekova, Álıhan Ydyrysheva, Lıdııa Kádenova, Dýlyǵa Aqmolda sekildi halyq ártisteri eńbek etetin teatr búginde shyǵarmashylyqtyń shynaıy mektebine aınalǵan. 145 adamnan turatyn ujymnyń 61-in jastar quraıdy. Bul – teatrdaǵy dástúr sabaqtastyǵynyń, jańa býynnyń qalyptasýynyń aıqyn kórsetkishi. Teatr dırektory Erlik Tileýqululy Kórkemdik bul jańalyqty teatr tarıhyndaǵy eń jarqyn belesterdiń biri dep baǵalady:
«Jarty ǵasyrlyq jolymyzda kórermenniń senimin aqtaýǵa, sahna mádenıetin bıiktetýge tyrystyq. Ár premera, ár qurmet, ár qoshemet – ortaq tarıhymyzdyń altyn paraǵy. Akademııalyq mártebe – tek ataq emes, bizdiń ónerge degen adaldyǵymyzdyń, ult rýhanııatyn damytýǵa qosqan úlesimizdiń joǵary baǵalanýy. Bul mártebe – ári qýanysh, ári úlken jaýapkershilik», deıdi ol.
Jetisý óńirinde teatr mádenıetiniń damýyna yqpal etip kele jatqan taǵy bir mańyzdy joba – «Biken Fest» halyqaralyq festıvali. Oblys qurylǵannan beri úzdiksiz uıymdastyrylyp kele jatqan bul óner merekesi bıyl О́zbekstan, Ázerbaıjan, Grýzııa, Qyrǵyzstan basqa da elderden kelgen 9 teatrdy biriktirip, shyǵarmashylyq tájirıbe almasýdyń biregeı alańyna aınaldy. Festıvaldyń turaqty ótýi Taldyqorǵan teatrynyń halyqaralyq bedelin arttyryp, kásibı baılanystaryn keńeıte tústi.
Halyq ártisi Almahan Kenjebekova bul mártebeni úlken serpilis retinde qabyldap, aldaǵy josparlarymen bólisti.
«Akademııalyq ataq – búkil ujymnyń tabandy eńbeginiń nátıjesi. Bul bizdiń halyqaralyq deńgeıdegi jobalarǵa keńinen qatysýymyzǵa, jas ártisterdiń kásibı damýyna, jańa shyǵarmashylyq zerthanalar ashýǵa jol ashady. Teatr – qoǵamnyń aınasy. Biz sol aınaǵa zamanaýı oı, ulttyq rýh, tereń mádenıet beınesin túsirýdi jalǵastyra beremiz», deıdi ol.
Al akademııalyq mártebe – teatrdyń jańa belesi. Bul ataq ujymǵa jańa múmkindik, jańa mindet júkteıdi. Jarty ǵasyrlyq tarıhy bar óner ordasy endi akademııalyq deńgeıde jańasha órleý kezeńine qadam basady.
Jetisý oblysy
