Sýretti túsirgen – Erlan OMAR, «EQ»
Jaqynda bir top BAQ ókilderi «Astana Tazalyq» kásiporny uıymdastyrǵan baspasóz týryna baryp, mekemeniń qysqa qamdanysy barysyn baqylap qaıtty. Seriktestiktiń bas dırektory Zamır Saǵynov kún saıyn jelige 700 jol jumysshysy shyǵatynyn, orta eseppen 408 arnaıy tehnıka qar tazalaýǵa, qolaısyz aýa raıynda jedel áreket etýge daıyn turatynyn málim etti. Qar qatty túspese de, jaıaý jumysshylar men kólik júrgizýshileri ádettegideı jumysqa jumylǵan. Mekeme kólikteri qar tazalap, kók muzǵa tuz sebýge ǵana shyqpaıdy. Qalada asfalt tóselmegen kósheler bar, keń joldardyń ózi yzǵarly aýa raıynda laılanady. Ony tazalaýǵa arnaıy tehnıka qajet. Jaıaý jumysshylar qarmen qosa kúl-qoqystardy, turmystyq qatty qaldyqtardy, laıdy tazalaıdy.
«Qala jyldan-jylǵa keńeıip, turǵyn úıler kóbeıip barady. Jol ústi, jıegi búlinbeı turmaıdy. Qala mańynda asfalt tóselmegen kósheler kóp. Sol aımaqtan shyqqan aýyr, jeńil kólikter qalaǵa kiredi. Olardyń alyp kelgen batpaq, basqasyn tazalaýǵa bizdiń mekeme jumylady. Búginde qysqa qajetti materıaldar qoryn tolyq kólemde jınaqtadyq. Qoımalarda 1 200 tekshe metrden astam qum, 4 400 tonna kóktaıǵaqqa qarsy qospalar, 1 000 tonna reagent saqtaýly. Arnaıy tehnıkanyń úzdiksiz jumysyn qalada ornalasqan úsh suıyq reagent quıý pýnkti qamtamasyz etedi. Olar «Esil», «Nura», «Saraıshyq», «Almaty», «Saryarqa», «Baıqońyr» aýdandaryna qyzmet kórsetip, elorda halqynyń jolda alańsyz qozǵalýyna múmkindik beredi», deıdi Z.Saǵynov.
Qysy qatal, aıazdy bolatyn Astananyń aýa raıy – kommýnaldyq qyzmetke jaýapty mekemelerge naǵyz synaq. Yzǵarly jeldiń ekpini kúsheıgende kóshe jıegindegi qardy kúreý – tipti beınetti eńbek. Sol sebepti qala tazalyǵyna jaýapty mekemeniń basshylyǵy jumysshylarǵa jaıly jaǵdaı jasaýǵa tyrysady. Qyzmetkerlerdiń barlyǵy derlik jumysqa mekemeniń kóligimen qatynaıdy. Sýyq kúnderi az-kem tynyǵyp, jylynyp alýǵa qolaıly oryndar saılanǵan. Bet qaratpaıtyn boranda jumysshylar sonda tynyǵady. Barlyq jumysshyǵa túski as beriledi. Osyǵan qosa, mekeme basshylyǵy jumysty jedeldetetin, qaýipsizdikti qamtamasyz etetin tyń sheshimder qabyldap jatyr. Sonyń kóbi sıfrlandyrýmen baılanysty. Mysaly, budan bylaı basshylyq Astana kóshelerine shyqqan ár tehnıkanyń qaı baǵytta júrgenin, qandaı kólemde reagent shashqanyn, qashan jumys bastaǵanyn – bári-bárin naqty ýaqyt rejiminde bilip otyrady. Bul eńbek ónimdiligin arttyryp, qala tazalyǵyndaǵy jumysty shıratýǵa kómektesedi.
«Elektrondy jol paraǵy» dep atalatyn júıeni tek baqylaý quraly dep tanyǵanymyz durys emes. Bul – kommýnaldyq qyzmettiń ashyqtyǵyn arttyratyn, jumystyń tıimdiligin birneshe ese kúsheıtetin jańashyldyq. Júıege qazir qalanyń 393 arnaıy tehnıkasy qosyldy. Jobaǵa Almaty qalasynyń ákimdigi de nazar aýdaryp, júıeni engizý jónindegi satyp alý rásimderin bastap ketken. Budan ózge, bizdiń mekeme Shymkent qalasynyń, Pavlodar, Qyzylorda oblystarynyń ákimdikterimen kelissóz júrgizip jatyr. Astanada bul tehnologııa «Astana-Teplotranzıt» AQ kólik quraldaryna engizilip jatyr. Júıe jeke kompanııalardyń da aıtarlyqtaı qyzyǵýshylyǵyn týdyryp, kommýnaldyq saladaǵy sıfrlyq sheshimderge degen suranystyń artqanyn kórsetip otyr», dedi Z.Saǵynov.
Jumys barysyndaǵy táýekelderdi azaıtý maqsatynda seriktestik «Med365», «Adal Check» júıelerin engizgen. Bul platformalar qyzmetkerlerdiń kúndelikti medısınalyq tekserýden ótýin onlaın formatta tirkep, júrgizýshilerdiń jumysqa ruqsat alý tártibin baqylaıdy. Nátıjesinde, tótenshe jaǵdaılardyń aldyn alý múmkindigi artady. Sonymen qatar júrgizýshi qaýipsizdik beldigin taqpasa, marshrýt aýystyrsa nemese uıyqtap ketse baqylaıtyn, eskertip, kómektesetin taǵy bir júıe iske qosylǵan. Osyndaı sıfrlyq sheshimder qazirdiń ózinde tıimdiligin kórsetip, jumys ónimdiligine, jumysshylardyń qaýipsizdigine oń yqpal etetinin kórsetken.
Baspasóz týry barysynda jýrnalıster kásiporynnyń tehnıkalary alańyn, reagentter jınalǵan qoımalaryn aralap kórip, qysqa daıyndyǵyna qanyqty. Sondaı-aq «Astana Tazalyq» seriktestiginiń jumysshylarǵa kórsetip otyrǵan áleýmettik qoldaý sharalarymen tanysty.
