Foto: Eńbek jáne halyqty áleýmettik qorǵaý mınıstrligi
Eńbek jáne halyqty áleýmettik qorǵaý mınıstrliginiń málimetinshe, 2025 jyldyń basynan beri 553,7 myń azamat onlaın-oqýdy aıaqtap, sertıfıkat ıelengen. Qazir platformada 1 mıllıonnan astam adam tirkelgen bolsa, onyń 710,3 myńy bıyl qosylǵan.
Aıta keteıik, platforma iske qosylǵaly beri jalpy 960 myń adam kásibı bilim alǵan.
«Oqýdy aıaqtaǵan 53,5 myń jumyssyz azamattyń shamamen 16,5 myńǵa jýyǵy negizinen Túrkistan oblysy (3,5 myń adam), Qyzylorda jáne Qostanaı oblystary (tıisinshe 2,5 jáne 2,8 myń adam), Almaty q. (2,3 myń adam), Almaty oblysy (2,2 myń adam) jastary (16-35 jas aralyǵy) boldy», delingen habarlamada.
Platformada avtorlar 1 000-nan astam kýrs ázirlegen, onyń 375-i tegin usynylady. Sonymen qatar Courstore, Fluent Education jáne Iаndeks Qazaqstannyń kýrstaryna da qosylýǵa múmkindik bar. Oqý uzaqtyǵy 6 saǵattan 72 saǵatqa deıin.
Qyrkúıek aıynda eń suranysqa ıe baǵyttar:
- IT jáne telekommýnıkasııalar;
- Aspaz-kondıter;
- Elektrondyq eńbek bırjasyn paıdalaný;
- Personaldy basqarý;
- Pishý jáne tigý.
Jumysshy mamandyqtar jylyna oraı bıyl mamyr aıynda mektep túlekteri men kolledj stýdentterine arnalǵan arnaıy kýrstar – «Seniń mansaptyq bastamań» jáne onyń orys tilindegi balamasy usynyldy. Bul baǵdarlamalar mamandyq tańdaýǵa kómektesip, jumys izdeý, ózin tanystyrý, ári Elektrondyq eńbek bırjasynyń múmkindikterin tıimdi qoldaný daǵdylaryn úıretedi.
