Foto: Úkimet
Oljas Bektenov sý tapshylyǵy jaǵdaıynda sýmen qamtamasyz etý máselelerin sheshý úshin keshendi sharalar qabyldaý qajettigin atap ótti. Egis alqaptarynyń qurylymyn ártaraptandyrýǵa basa nazar aýdaryldy.
Premer-mınıstr basty mindet sýdy kóp qajet etetin daqyldardyń úlesin qysqartý jáne sý únemdeý tehnologııalaryn engizý ekenin atap ótti. О́ńir ákimdikteri men ýákiletti memlekettik organdar egis alqaptarynyń qurylymyn ártaraptandyrý boıynsha ındıkatorlardyń múltiksiz oryndalýyn qamtamasyz etýi qajet. Sý resýrstary mınıstrligi bekitilgen lımıtterden tys sý berý jaǵdaılarynyń aldyn alýy tıis.
«Sý resýrstary mınıstrligi bekitilgen lımıtterden tys sý berý jaǵdaılarynyń aldyn alsyn. Bul ózekti másele, men qaıtalap aıtamyn. Aýyl sharýashylyǵy mınıstrligi egis alqaptaryn ártaraptandyrý jóninde tıisti keste bekitti, aldaǵy ýaqytta barlyq jumys osy kestege sáıkes júrgizilýi tıis. Mysaly, eger bir sharýashylyqta 100 gektar bolý kerek desek, erteń 1 gektardan artyq egilse, biz oǵan bir tamshy sý bermeımiz. Eger erteń Aýyl sharýashylyǵy mınıstrligi bekitken kórsetkishterdi buzyp, dıqandar shyǵynǵa ushyrasa, bir tıyny da bıýdjetten ótelmeıdi. Muny halyqqa ashyq jetkizý kerek», dedi Oljas Bektenov.
Atalǵan másele Premer-mınıstr tikeleı baqylaýynda.
Oblys ákimderine 2026 jylǵy vegetasııalyq maýsymǵa daıyndyq aıasynda kommýnaldyq menshiktegi gıdrotehnıkalyq nysandar men ırrıgasııalyq kanaldarǵa jóndeý jumystaryn júrgizý tapsyryldy.
Sondaı-aq 2026 jyldyń shildesinde Shardara toptyq sý qubyrynyń qurylysy aıaqtalady, bul qala turǵyndaryn aýyz sýmen úzdiksiz qamtamasyz etýge múmkindik beredi. Atalǵan másele Premer-mınıstrdiń baqylaýynda.
Sý resýrstary jáne ırrıgasııa mınıstrligine, shekara mańyndaǵy óńirlerdiń ákimdikterine qajetti sý kóleminiń der kezinde kelýin qamtamasyz etý úshin kórshiles memlekettermen tyǵyz jumys júrgizý tapsyryldy.
Premer-mınıstrdiń orynbasary Qanat Bozymbaev elimizdiń ońtústik óńirleri boıynsha sý tapshy kezeńniń jalǵasyp jatqany rastalǵanyn: Shardara sý qoımasyna sý kelýi 43%-ǵa, Naryn – Syrdarııa kaskadyndaǵy sý kólemi 3,8 mlrd m3 tómendegenin baıandady. 2026 jylǵy vegetasııalyq kezeńge boljamdy sý kelýi 1-2 mlrd m3 dep baǵalanyp otyr, bul 1 mlrd m3 deıin tapshylyq qaýpin týdyrady.
Jambyl oblysynda sý qoımalary tek 41%-ǵa toldy. 2025 jyly kúrish pen maqta daqyldary josparly kórsetkishterden asyp tústi. Sonymen qatar sý únemdeý tehnologııalary qoldanylatyn jer kólemi 543,5 myń gektarǵa jetti, jyl saıynǵy ósim shamamen 150 myń gektardy quraıdy. 2026-2028 jyldarǵa arnalǵan bıýdjette sýdy únemdeýdi qoldaýǵa 228,1 mlrd teńge qarastyrylǵan.
Buǵan deıin, 2025 jyldyń shilde aıynda Premer-mınıstr ońtústik óńirlerdiń ákimderine eginge qajetti sýdyń utymdy paıdalanylýyna qatań baqylaýdy qamtamasyz etýdi, ylǵaldy kóp qajet etetin daqyldardyń ruqsatsyz egilýine jol bermeýdi jáne halyqty sýmen úzdiksiz qamtamasyz etý úshin aldyn ala sharalar qabyldaýdy tapsyrǵan edi. Tekserý qorytyndysy boıynsha ylǵalsúıgish daqyldardy ruqsatsyz egýge jol bergen laýazymdy tulǵalar tártiptik jaýapkershilikke tartyldy.
