foto: ashyq derekkózden
«Balalardyń bos ýaqytyn tıimdi ótkizý úshin biz budan da kóp shara qabyldaýymyz qajet. Jaı ǵana «tyıym salaıyq» dep aıtý jetkiliksiz. Balaǵa qaýip tóndiretin aty tanymal oıyndar bar. AQSh-ta, Anglııada da kóptegen faktiler tirkelgen. Men ol oıyndardyń ataýyn aıtqym kelmeıdi, biraq sonyń kesirinen pedofılder balalarmen kezdesýler uıymdastyrǵan jaǵdaılar boldy, tipti zorlaý faktileri de tirkeldi. Sýısıdke aparǵan oqıǵalar da bar. Sondyqtan bul máselege rasıonaldy qaraý kerek», dedi ol.
Depýtattyń aıtýynsha, eń aldymen keshendi júıeli tásil qajet.
«Bul, eń aldymen, mektepterde smartfondy shekteý. Bes jáne toǵyz jastaǵy balalar kúni boıy TikTok qarap, vıdeolardy syrǵytyp otyra almaıdy. Bul olardyń densaýlyǵyna keri áser etedi. Balalar úshin úıirmeler men seksııalardyń sanyn arttyrý da mańyzdy», dedi Aımaǵambetov.
Ol sondaı-aq elde oıyn avtomattaryna tyıym salynǵanyna qaramastan, balanyń ózimen birge qaltasyna «sol avtomattyń kishireıtilgen nusqasyn» alyp júretinin atap ótti.
«Bul – táýeldilik týdyrady. Sondyqtan kıbergıgıena, sıfrlyq saýattylyq, kitap oqýǵa baýlý, bir-birimen tildesý – jasandy ıntellekt dáýirinde asa mańyzdy. Mektep tek sabaq oqıtyn oryn emes, ol – áleýmettený alańy. Úzilis kezinde balalar bir-birimen sóılesýi kerek. Biraq biz ne kórip júrmiz? Úziliste ár bala telefon shyǵarady da, qarym-qatynas, ózara baılanys degen bolmaı qalady», dep qosty depýtat.
Eske salaıyq, ótken aptada Qazaqstanda 16 jasqa deıingi balalarǵa áleýmettik jelilerdi qoldanýǵa tyıym salý týraly zań jobasy qoǵamdyq talqylaýǵa shyǵarylǵan edi. Joba talqylaýy 29 jeltoqsanǵa deıin jalǵasady.
Sondaı-aq 16 jasqa deıingi balalardyń áleýmettik jelilerge qoljetimdiligin retteıtin zań jobasy da ázirlengen edi.
