Foto: Ashyq derekkóz
Depýtattyń aıtýynsha, shetelde bılet tolyq baǵamen satylsa, kompanııa tutynýshy qarajatyn paıdalanǵany úshin jaýapkershilik alady jáne aqshany qaıtarýdan bas tartpaıdy.
«Mysaly, bılet 40 myń teńge, al men ony jeńildikpen 12 myńǵa satyp aldym, mundaı bıletterdiń bir bóligi qaıtarylmaıtyn bolýy múmkin. Biraq bizde olaı emes. Qazaqstanda bıletterdiń basym bóligi negizsiz «qaıtarylmaıdy» dep rásimdeledi. Kelisimshartty kórsetpeı turyp, tutynýshydan aqsha ustap qalýǵa eshkimniń quqyǵy joq», dedi ol.
Ábenov vıse-mınıstr Talǵat Lastaevtyń málimdemesin synǵa alyp, memlekettik qyzmetker qoǵamǵa jalǵan túsinik qalyptastyrmaýy tıis ekenin atap ótti.
«Parlamentke kelmeı turyp, máseleni tolyq zerttemeı, qoǵamdy depýtattarǵa qarsy qoıý – etıkaǵa da, zańǵa da qaıshy. Bul jeke tasymaldaýshylardyń múddesin qorǵaý. Al bıletter bizde onsyz da tym qymbat», dedi májilismen.
Ol sonymen birge avıakompanııalar buǵan deıin jeńildikter suraǵanyn, alaıda tutynýshy úshin bılet baǵasy arzandamaǵanyn mysalǵa keltirdi.
«Qyzylordaǵa bılet aldyn ala alsam da, 40 myń teńge. Taǵy da «qaıtarylmaıdy» deıdi. Bul júıeniń jónsizdigi», dedi depýtat.
Esterińizge sala keteıik, 8 jeltoqsanda Murat Ábenov Qazaqstanda «qaıtarylmaıtyn bıletterdi» joıý bastamasyn jarııalaǵan bolatyn. Al keshe vıse-mınıstr Talǵat Lastaev bul qadam áýe bıletteriniń qymbattaýyna ákelýi múmkin ekenin aıtqan edi.
