Osy kampanııa aıasynda Astanada NazymPR kommýnıkasııalyq býtık-agenttiginiń negizin qalaýshy, QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń múshesi Nazym Jańǵazınovanyń, sondaı-aq jeke kásipkerlerdiń qoldaýymen «Qorǵaý» daǵdarys ortalyǵynda qaıyrymdylyq is-sharasy ótti. Bul ortalyqta turmystyq zorlyq-zombylyqqa tap bolǵan áıelder men balalarǵa kómek kórsetiledi.
Daǵdarys ortalyǵyna elektrli plıta, muzdatqysh, qamyr ılegishter, blenderler, sondaı-aq balalar oıynshyqtary, náreste taǵamy jáne ózge de qajetti taýarlar satyp alyndy.
Áıelder úshin nan-toqash ónimderin ázirleý boıynsha sheberlik saǵaty uıymdastyryldy, olar kásibı kosmetologtan keńes pen kútim aldy.
«Bul jerge túrli áıelder keledi, olardyń qatarynda kópbalaly, erekshe qajettilikteri bar balalardy tárbıelep otyrǵan analar bar. Kez kelgen áıel úshin mundaı daǵdarys jaǵdaıyna tap bolý óte qıyn, olar abdyrap, ne isteý kerektigin bilmeı qalady. Biz olarǵa: „Sizder jalǵyz emessizder, qastaryńyzdamyz“, degendi jetkizgimiz keldi», dedi Nazym Jańǵazınova.
Is-sharaǵa Májilis depýtattary Maksım Rojın, Bolat Kerimbek, Ekaterına Smolıakova, Samat Nurtaza, sondaı-aq qoǵamdyq uıymdar men jýrnalıster qatysty.
Májilismender «Qorǵaý» ortalyǵyndaǵy áıeldermen sóılesip, olardyń ózekti máselelerin talqylady. Kóterilgen taqyryptar qatarynda ajyrasý kezinde múlikti bólý, jubaıynyń azamattyǵynyń bolmaýy, analardyń balalarymen bólek turýy, seriktestiń emosııalyq qysymy syndy problemalar bar. Sonymen qatar er adamdarǵa arnalǵan psıhologııalyq kómek ortalyqtaryn ashý qajettiligi týraly usynys aıtyldy.
Depýtattar ortalyqtyń qyzmet alýshylary men ókilderin tyńdap, áleýmettik jáne quqyqtyq máselelerdi sheshýge baǵyttalǵan bastamalardy qoldaýǵa daıyn ekenderin bildirdi. Olardyń qatysýy bul taqyryptyń mańyzdylyǵyn jáne turmystyq zorlyq-zombylyqqa bárimiz jaýapty ekenimizdi eske saldy. Usynystardyń biri - óńirlik áıelder qaýymdastyqtaryn daǵdarys ortalyqtaryna jetekshilik etýge tartý.
«Mundaı ortalyqtar óte mańyzdy, biraq olarǵa júginýge sebep bolatyn jaǵdaılar azaısa eken deımiz. Jeke sektor mundaı bastamalardy belsendirek qoldasa, bul kómek júıesiniń tutastaı kúsheıýine yqpal etedi», dep atap ótti Májilis depýtaty Ekaterına Smolıakova.
«Qorǵaý» ortalyǵynda áıelder psıhologtyń, zańgerdiń, áleýmettik qyzmetkerdiń kómegin ala alady jáne qajet bolǵan jaǵdaıda 6 aıǵa deıin qaýipsiz jerde ýaqytsha turýǵa múmkindik bar.
Qorǵaý» ortalyǵynyń jedel jeli nómiri: +7 (702-89) 2-97-77
