Foto: SIM
Syrtqy ister mınıstriniń orynbasary Álibek Qýantyrov pen «Kazakh Invest» ulttyq kompanııasy» AQ Basqarma tóraǵasynyń orynbasary Madııar Sultanbek qytaılyq «Zhongyoung Power» kompanııasynyń bas dırektory Lı Szıanszıanmen kezdesti. Kezdesý barysynda qytaılyq tarap Qazaqstandaǵy elektr energetıkalyq ınfraqurylymdy jańǵyrtýǵa qatysýǵa nıetin jetkizdi.
Mınıstrliktiń málimetinshe, kompanııa «Energetıka jáne kommýnaldyq sektordy jańǵyrtý» ulttyq jobasyna qatysýǵa múddeli.
«Bul baǵdarlama aıasynda jóndeýdi, jańartýdy jáne qaıta qurýdy qajet etetin nysandardyń keń tizimi aıqyndalǵan. Lı Szıanszıan atap ótkendeı, «Zhongyoung Power» kompanııasy memlekettik-jekeshelik seriktestik (MJS) jáne tarıftik model arqyly ınvestısııany qaıtarý sııaqty halyqaralyq tájirıbede qoldanylatyn qarjylandyrý tetikterin qarastyrýǵa daıyn. Sonymen qatar ol jobalardy iske asyrý kezinde Qazaqstanda óndirilgen jabdyqtar men transformatorlardy paıdalanýǵa nıetti ekenin aıtty», delingen habarlamada.
Kezdesý barysynda taraptar qosalqy stansııalardy jańartý, eski jabdyqtardy almastyrý, jańa transformatorlyq qýattar salý jáne orta jáne joǵary kerneýli jelilerge zamanaýı sheshimderdi engizý múmkindikterin talqylady.
Álibek Qýantyrov energetıka sektoryn jańǵyrtý strategııalyq basymdyq ekenin atap ótti. Ol MJS jáne tarıftik tetikterdi qoldaný arqyly halyqaralyq tájirıbesi bar senimdi seriktesterdi tartý múmkindigin atap, sondaı-aq keıbir jabdyqtardy Qazaqstanda óndirý jáne uzaq merzimdi jobalarda jergilikti kásiporyndarmen kooperasııa qurýdy usyndy.
Madııar Sultanbek óz kezeginde memlekettik qoldaý quraldary men energııa jelilerin jańǵyrtýdyń ulttyq jáne óńirlik baǵdarlamalaryna qatysý joldaryn tanystyrdy. Ol energııa tıimdiligin arttyrý jáne zamanaýı tehnologııalardy engizýge baǵyttalǵan usynystardy qaraýǵa daıyn ekenin aıtty.
Kezdesý sońynda taraptar óndiristi lokalızasııalaý men jobalardyń tehnıkalyq parametrlerin baǵalaýdy qosa alǵanda, yqtımal yntymaqtastyq nysandaryn talqylaýdy jalǵastyrýǵa ýaǵdalasty. Sonymen qatar Qytaı delegasııasyna Energetıka mınıstrligimen jeke kezdesý uıymdastyrylyp, salalyq talaptar men ınfraqurylymdyq qajettilikter talqylandy.
