6 tamyz kúni Rýslan Berdenovke oq atqan Ernar Jıembaıǵa qatysty basty sot otyrys ótti. Tergeý barysynda kúdikti tyń derekterdi jarııa etti. Onyń aıtýynsha, Rýslan Berdenov Ernardan ózin óltirýge Ǵabıt Syzdyqbekov tapsyrys berdi dep aıtýdy suraǵan.
Bul oqıǵaǵa qatysty Shymkent ákimi «Syzdyqbekov Berdenovke qastandyq jasaýǵa tapsyrys berdi» degen sózine qatysty bylaı dedi:
«Ár adam óz pikirin aıtýǵa quqyly. Meniń bul iske qatysym bar degen áńgime – bos qaýeset, ózderiniń máselesi. Meniń oǵan qandaı qatysym bolýy múmkin? Árıne, adam ózin qorǵaý úshin bárin jasaıdy. Is aıaqtaldy, sot sheshim shyǵardy, bul taqyrypty qaıta-qaıta kóterýdiń qajeti joq dep oılaımyn», dedi Syzdyqbekov.
Ol sondaı-aq jelide taraǵan túrli boljamdar men áńgimelerden habardar ekenin aıtty.
«Keıbir turǵyndar «osy adam kelgende (Berdenov týraly – red.) qala jarqyrap shyǵa keldi» dep jazǵan. Biraq bul shyndyqqa janaspaıdy. Ol kezde ol qyzmetine kiriskenine bir aı da tolmaǵan, jumystyń jaıyna endi ǵana qanyǵyp jatqan. Odan keıin ne bolǵanyn ózderińiz bilesizder», dedi ákim.
Syzdyqbekovtiń aıtýynsha, Berdenov qyzmetinen óz erkimen ketken.
Eske sala keteıik, 2025 jyldyń 21 sáýirinde Shymkent qalasy ákimdigi janynda belgisiz er adam ákimniń orynbasary Rýslan Berdenovke oq atty. Sheneýnik jaralanyp, aýrýhanaǵa jetkizilgen edi.
Keıinirek oq atqan adamnyń 31 jastaǵy Ernar Jıembaı ekeni anyqtaldy. Ol Qylmystyq kodekstiń 24-baby 3-bóligi jáne 99-baby 1-bóligi «Kisi óltirýge oqtalý» aıybymen jaýapqa tartyldy.
18 tamyzda ótken sot otyrysynda aıyptalýshy Ernar Jıembaı jábirlenýshi sheneýnikten keshirim suraǵan edi.
20 tamyzda Ernar Jıenbaı kináli dep tanylyp, orta qaýipsizdik mekemesinde 9 jylǵa bas bostandyǵynan aıyryldy. Sondaı-aq, jábirlenýshige 30 AEK (2025 jyly – 117 960 teńge) ótemaqy tóleýge mindetteldi.
