Kollaj: Ulysmedia
Depýtattyń aıtýynsha, Joǵarǵy sot birinshi satydaǵy jáne apellıasııalyq alqanyń sheshimderin ózgerissiz qaldyrǵan. Osylaısha, ál-Farabı atyndaǵy Qazaq ulttyq ýnıversıtetine tıesili bolǵan jer resmı túrde memleket menshigine ótti.
«Endi Tımýr jáne Dınara Qulybaevtarǵa tıesili «Omirex» pen «Atlas Development» seriktestikteri eki joldyń birin tańdaýy kerek. Zańǵa sáıkes, bıznes-ortalyqty ózderi súrip tastaıdy nemese ony QazUÝ-dyń balansyna beredi. Men bul máseleni Májilis minberinen birneshe ret kóterdim. Ǵımarat stýdentterge qyzmet etse degen usynys aıtyldy. Alaıda kompanııalar ýnıversıtetke berýden bas tartyp otyr. Kerisinshe, jergilikti atqarýshy organnan shyǵyndy óteýdi talap etip, jer qatynastary basqarmasyna aryz túsirgen», dedi Baqytjan Bazarbek Májilistiń Instagram paraqshasynda ótken tikeleı efırde.
Onyń sózinshe, eger jer telimi bosatylmasa, nysan memleketke qaıtarylmasa nemese óz erkimen súrilmese, Májiliste sot sheshimi arqyly májbúrlep súrý máselesin kóterýge nıetti.
«Zań bárine ortaq», dedi depýtat.
Eske salsaq, 2022 jyldyń qazan aıynda Almaty qalasy boıynsha Jer resýrstaryn basqarý komıtetiniń departamenti ál-Farabı atyndaǵy QazUÝ aýmaǵynyń bir bóligin ıelikten shyǵarý zańdylyǵyna tekserý júrgizgen. Nátıjesinde qala ákimdigi tıisti qaýlyny zańsyz qabyldaǵany anyqtalǵan.
Buǵan deıin Baqytjan Bazarbek Tımýr Qulybaevqa tıesili kompanııalar Almaty ákimdiginen bıznes-ortalyq qurylysyna jumsalǵan 34 mlrd teńgeni óndirip alýdy kózdep otyrǵanyn málimdegen edi.
