foto: ashyq derekkóz
Taldyqorǵan qalasynyń jergilikti turǵyny áleýmettik jelilerdi qarap otyryp, Qazaqstanǵa tanymal kompanııalardyń biriniń baǵaly qaǵazdaryna ınvestısııa salýdy usynǵan jarnamaǵa nazar aýdarǵan. Syrt kózge senimdi kóringen habarlama kúmán týdyrmaı, er adam silteme arqyly ótip, kórsetilgen saıtqa tirkelgen.
Osydan keıin ózin kompanııanyń «menedjerleri» retinde tanystyrǵan adamdar habarlasyp, psıhologııalyq tásilder arqyly joǵary tabys ýáde etken. Nátıjesinde jábirlenýshi 13 mıllıon teńgeni «ınvestısııa» retinde aýdarǵan. Alaıda ýáde etilgen paıda túspegen. Biraz ýaqyt ótken soń ǵana ol muqııat oılastyrylǵan alaıaqtyq shemanyń qurbany bolǵanyn ańǵarǵan.
Jábirlenýshi ýaqyt ozdyrmaı Taldyqorǵan qalasynyń polısııa basqarmasyna aryzdanǵan. Qylmysty kıberqylmystardy tergeý jónindegi bólim qyzmetkerleri dereý qolǵa alǵan. Jas tergeýshi Azamat Janatulynyń jetekshiligimen qysqa merzim ishinde urlanǵan qarajatty alýǵa qatysy bar dropperler anyqtalǵan.
Polısııanyń úılesimdi ári jedel jumysynyń nátıjesinde alaıaqtyq jolmen alynǵan barlyq aqsha zańdy ıesine tolyq qaıtaryldy. Quqyq qorǵaý organdary azamattardy qyraǵy bolýǵa, kúmándi ınvestısııalyq usynystarǵa senbeýge jáne aldaýdyń alǵashqy belgileri baıqalǵan sátte birden polısııaǵa júginýge shaqyrady.
