Foto: Turizm jane sport ministrligi
Qazaqstan quramasy bastapqy kezeńde Ońtústik Koreıaǵa 9:10, Iran komandasyna 3:5 esebimen jeńilse de, komanda oıyn júıesin rettep, taktıkalyq turǵyda jınaqtalyp, kezdesýlerdiń barysyn óz paıdasyna sheshe bildi. Nátıjesinde otandas golbolshylar Saýd Arabııasyn 12:7, Taılandty 11:1 esebimen jeńip, pleı-off kezeńine joldama aldy.
Jartylaı fınalda Qazaqstan quramasy Iran komandasyn 7:5 kórsetkishimen utyp, fınaldyq básekede Ońtústik Koreıa quramasynan 9:6 esebimen basym túsip, jarystyń altyn júldegeri atandy.
«Jarys barysynda barlyǵy alty oıyn ótkizdik. Sportshylar jarysqa jaqsy daıyndyqpen keldi. Memleket qoldaýymen Almaty men Astanada oqý-jattyǵý jıyndary uıymdastyryldy. Nátıjege kóńilimiz tolady. Komanda quramyndaǵy alty sportshynyń tórteýi úshin bul alǵashqy halyqaralyq jarys bolǵanyna qaramastan, olar ózderin joǵary deńgeıde kórsete bildi», dedi bas bapker Andreı Shpeht.
V Azııa Para oıyndary osy aıdyń 10-13 kúnderi Dýbaıda (BAÁ) ótti. Dúbirli dodada elimiz neshe medal alǵanyn osyǵan deıin jazǵanbyz.
