Premera qonaqtarynyń qatarynda tanymal akterler Artýr Askaruly, Sanjar Mádı, belgili aktrısalar Ásel Qalıeva, Nuraı Jetkergen, rejısser jáne prodıýser Qýanysh Beısek, prodıýser ári ıntervıýer Tımýr Balymbetov, mýzykant dudeontheguitar, ánshi Ayau, stendap-komık Shyńǵys Ermek, sondaı-aq tanymal blogerler Azıza Aıbadýllına, Birjan Áshim jáne basqa da óner ókilderi boldy. Sonymen qatar premeraǵa «Avatar: Ot pen kúl» fılminiń dýblıaj rejısseri Shah-Murat Ordabaev ta qatysty.
«Biz úshin qazaqstandyq kórermenderdiń «Avatar: Ot pen kúl» fılmin óz ana tilinde tamashalaı alýy – erekshe mańyzdy. Bul premera – jyldyń eń mańyzdy oqıǵalarynyń biri. Al biz úshin, dıstrıbıýtor retinde jyldy aýqymdy ári birlikke shaqyratyn sharamen qorytyndylaýǵa berilgen múmkindik. Bul fılm otbasyn bir shańyraq astyna jınap, urpaqtar sabaqtastyǵyn nyǵaıtady, otbasylyq qundylyqtardyń mańyzyn eske salady. Álemdik premerany óz ana tilinde kórý kórermen úshin shynymen de mańyzdy. Buǵan Disney stýdııasynyń «Ańdar shahary 2» anımasııalyq fılminiń qazaqsha dýblıajynyń kórsetkishi dálel bola alady. Fılm Qazaqstandaǵy jalpy kassalyq tabystyń 15,7%-yn qurady. Bul buǵan deıingi gollıvýdtyq fılmderdiń qazaqsha nusqalarynan joǵary nátıje kórsetti. Qazaqstandyq kórermenderdiń vızýaldyq múmkindikteri, aýqymy men eliktirer oqıǵasy tánti etetin osy biregeı tarıhtyń bir bóligine aınalyp jatqanyn kórý – biz úshin úlken qýanysh», dedi Ascar Cinema kompanııasynyń marketıng dırektory Dınara Chekanova.
«Endi álemdik kınoındýstrııanyń eń aýqymdy jobalarynyń biri – «Avatar» fılminiń úshinshi bólimin qazaq tilinde kóremiz. Bul – jaı ǵana aýdarma emes, qazaq tiliniń jahandyq mádenı keńistikte óz orny qalyptasyp kele jatqanynyń belgisi. «Avatar» – tutas órkenıet pen fılosofııany qamtıtyn álem. Sol álemniń qazaqsha sóıleýi – tilimizdiń múmkindigi men áleýetin arttyryp, ony zamanaýı mádenıettiń tolyqqandy tiline aınaldyrady dep senemiz», dedi Halyqaralyq «Qazaq tili» qoǵamynyń prezıdenti Raýan Kenjehanuly.
