Túrikmenstan kásipkerleri elinen qashyp jatyr

ASTANA. 23 naýryz. Ústimizdegi jyldyń naýryz aıynyń basynda Túrikmenstannyń iri kásipkerleri otbasylarymen birge elden boı tasalady. Olardyń basym bóligi Birikken Arab Ámirliginen, qalǵandary Túrkııa men Reseıden úı satyp alǵan. Bul týraly chrono-tm.org habarlady. Tarata aıtar bolsaq, kásipkerlerdiń biri Túrikmenstanda jumys isteý múmkin emes deıdi. Sebebi, el prezıdentiniń týystary iri-iri kompanııalardyń jumysyna kedergi keltirip, bıznes salasynda olardyń tabystaryn óz baqylaýlarynda ustaǵysy keletin kórinedi. Sondaı-aq, álgi azamat: «Men salyq tóleýden teris aınaldym. О́ıtkeni, olardyń aqshaǵa degen tábetteri kún saıyn emes, saǵat saıyn artyp barady. Elde qarjylyq shıelenis, salyq tólemderiniń ósýi anyq baıqalyp otyr. Kásipkerlerdiń derligi shyǵynǵa batty. Munda eshqandaı bolashaq joq. Sheteldik iri kompanııalardyń elden tez ketýi beker emes», – depti. Aıta keteıik, ázirge elden shyǵyp ketken 6 kásipkerdiń aty belgili bolyp otyr. Alaıda, bulardan bólek qansha bıznesmen Túrikmenstannan ketkenin eshkim dóp basyp aıta almaýda. Olardyń arasynda memleketpen jáne Polimeks, Halliburto sekildi tanymal fırmalarmen áriptestik baılanys ornata otyryp, elge qurylys tehnıkalary men materıaldaryn, munaı jáne gaz qondyrǵylaryn tasymaldaýshy qurylymdardyń jetekshileri bar. Talǵat Raıymbek. Derek, sýret: chrono-tm.org.