Sala basshysynyń aıtýynsha, bıyl elimizde sý sharýashylyǵy ınfraqurylymyn damytý boıynsha 145 joba qolǵa alynǵan. Sonymen qatar shamamen 300 nysanǵa arnalǵan jobalaý-smetalyq qujattama men tehnıkalyq-ekonomıkalyq negizdeme ázirlenip jatyr eken.
Atap aıtqanda, Almaty oblysyndaǵy Qyzylaǵash, Abaı oblysyndaǵy Shar sýqoımalaryn rekonstrýksııalaý tolyq atqaryldy. Astana sýqoımasyn aýqymdy tazalaý jumystarynyń birinshi kezeńi aıaqtaldy.
Sonymen qatar bıyl Túrkistan oblysyndaǵy Qapshaǵaı sýqoımasyn rekonstrýksııalaý, Batys Qazaqstan oblysyndaǵy Kırov sýqoımasynyń sońǵy 58 jylda alǵash ret júrgizilip otyrǵan kúrdeli rekonstrýksııasyn aıaqtaý kózdelip otyr.
Shý ózenindegi Fýrmanov aınalma kanalynda sońǵy 40 jylda alǵash ret mehanıkalyq tazalaý jumystaryn júrgizip, Túrkistan oblysynda «Qaraqýys» jáne «Báıdibek-ata» sýqoımalarynyń qurylysy jalǵasyp jatyr. Jobamen 2026 jyly aıaqtalady. Bul qosymsha shamamen 69 mln tekshe metr sý jınaýǵa múmkindik beredi. Kóksaraı kontrrettegishindegi jóndeý jumystary aıaqtaldy. Bul jumys nysannyń sý jınaý kólemin 2 mlrd tekshe metrge deıin ulǵaıtady.
Jóndeý men rekonstrýksııadan ótken 700 shaqyrymnan astam ırrıgasııa jelisin paıdalanýǵa berý josparlanyp otyr.
Sondaı-aq 469 myńnan astam adam turatyn 224 eldi mekendi sýmen qamtamasyz etetin 13 toptyq sý qubyryn paıdalanýǵa berý josparda. Onyń ishinde 32 myń turǵyny bar 43 eldi meken alǵash ret ortalyqtandyrylǵan sýmen jabdyqtaldy.
Keıingi eki jyl ishinde Qazaqstannyń sý sharýashylyǵy salasynyń negizgi kapıtalyna tartylǵan ınvestısııa kólemi 579 mlrd teńgeni qurady. Mınıstrlik sheteldik seriktestermen 7 kelisimge jáne 30-dan astam memorandýmǵa qol qoıdy.
Eki jylda sý únemdeý tehnologııalaryn engizý birneshe ese artyp, orta eseppen
150 myń gektarǵa jetti. Sý únemdeý tehnologııalary qoldanylatyn egistik aýdany jalpy 543,5 myń gektarǵa ósti. 2030 jylǵa qaraı bul kórsetkishti 1,3 mln gektarǵa jetkizý josparlanyp otyr.
Osy maqsattarǵa jetý úshin 2026–2028 jyldarǵa respýblıkalyq bıýdjette 228 mlrd teńgeden astam qarajat qarastyrylǵan, bul aldyńǵy úshjyldyq kezeńmen salystyrǵanda tórt ese kóp.
Mınıstrlik «Qazsýshar» RMK fılıaldary úshin 757 arnaıy tehnıka men avtokólik satyp alý jumysyn bastady. «Qazsýshar» RMK qyzmetkerleriniń jalaqysy bıyl 1 shildeden bastap 35-50%-ǵa artty. Sonymen qatar 2028 jylǵa deıingi Jol kartasy aıasynda Qanysh Sátbaev kanalyn jańǵyrtý bastaldy. Sý sharýashylyǵy salasynyń 1000-nan astam mamany biliktiligin arttyrý kýrstarynan ótti, bul 2024 jylmen salystyrǵanda eki ese kóp.
«Osy sharalar basty maqsatqa – sý resýrstaryn tıimdi jáne utymdy paıdalanýǵa qol jetkizýge baǵyttalǵan. Bul ekonomıkamyzdyń turaqty damýy men azamattarymyzdyń ál-aýqatyn arttyrý, sondaı-aq eldiń uzaqmerzimdi sý qaýipsizdigin qamtamasyz etý mindeti», dedi Sý resýrstary jáne ırrıgasııa mınıstri Nurjan Nurjigitov.
Jıynda vıse-mınıstr A.Ábdraımov jýrnalısterge Sý resýrstarynyń ulttyq aqparattyq júıesin ázirleý barysy, sýyn jetkizý boıynsha elektrondyq kelisimsharttardy engizý júıesiniń pılottyq synaqtary, sondaı-aq ózen aǵysyn modeldeý jáne boljaý júıelerin engizý boıynsha atqarylǵan jumystar týraly aıtty.
