«Astana» Estonııa komandasyn jeńdi

ASTANA. 23 aqpan. VTB lıgasy aıasynda «Astana» basketbol komandasy óz alańynda estonııalyq «Kalevti» 93:72 esebimen jeńdi. Bul týraly egemen.kz habarlady. Oıyn tizginin birden óz qoldaryna alǵan alań ıeleri alǵashqy kezeńdi 24:18 esebimen óz paıdalaryna aıaqtady. Áıtse de, kelesi kezeńde qonaqtar jınaqylyq tanytyp, 25:17 esebimen basym tústi. Nátıjesinde, úlken úziliske «Kalev» komandasy 2 upaı basymdyǵymen attandy (43:41). Úshinshi kezeń taǵy da qonaqtardyń basymdyǵymen bastaldy. Degenmen, bul joly Djerrı Djonson men Djeıkovan Braýn bastaǵan «Astana» oıynshylary «Kalevtiń» qarqynyna toıtarys bere aldy. Kezeńdi 25:21 esebimen aıaqtaǵan astanalyqtar jalpy esepte de alǵa shyqty (66:64). Al sheshýshi tórtinshi kezeńde Ramýnas Býtaýtastan tálim alatyn «Astana» oıynshylary qarsylastarynyń adymyn ashtyrmardy. Sońǵy kezeń 27:8 esebimen elordalyqtardyń paıdasyna aıaqtaldy. Bul Ramýnas myrza kelgeli «Astananyń» VTB lıgasyndaǵy alǵashqy jeńisi. Bizdiń komanda osyǵan deıin jeti oıyn qatarynan jeńilgen edi. Osy jeńisten keıin elordalyq komanda týrnır kestesinde eki saty joǵary órlep, 12-orynǵa taban tiredi. Lıga aıasyndaǵy kezekti oıynyn «Astana» 1 naýryz kúni syrt alańda Saratovtyń «Avtodoryna» qarsy ótkizedi. Elaman Qońyr. Derek: egemen.kz. Sýret: bcastana.kz.