Foto: gov.kz
Ekonomısttiń pikirinshe, búginde salalyq mınıstrlikter standart pen saıasatty qalyptastyrýdyń ornyna kóbi tarıf esepteýmen, bıýdjet bólýmen, satyp alýmen aınalysyp ketken. Mundaı retsizdik óz kezeginde basqarý isinde shatasýǵa jáne sybaılas jemqorlyq táýekelderine ákelýi yqtımal.
«Mınıstrlikter óz salasynyń mazmundyq bóligine – medısınaǵa, bilimge, ǵylymǵa nazar aýdarýy tıis. Al qarjylyq jáne ekonomıkalyq taldaýdy Qarjy mınıstrligi men Ulttyq ekonomıka mınıstrligi júrgizýi kerek. Qazirgi densaýlyq saqtaý júıesinde bir organǵa tym kóp mindet júktelgen. Densaýlyq saqtaý mınıstrligi bir mezette emdeý standarttaryn ázirleıdi, dári-dármek satyp alady, bıýdjet josparlaıdy jáne baǵany baqylaıdy. Nátıjesinde medısınalyq sheshimder men ekonomıkalyq sheshimder aralasyp ketedi», dedi Rýslan Sultanov economyKZ.org saıtynda jarııalanǵan pikirinde.
Sondaı-aq sarapshy jeke mektepter men ýnıversıtetter de qos baqylaýǵa túsip otyrǵanyn jetkizdi. Bilim mınıstrligi ári retteýshi, ári qarjy bólýshi rólinde bolǵandyqtan, jeke sektordyń damýy tejelýi yqtımal. Sondyqtan Rýslan Sultanov máseleni sheshý úshin naqty 5 usynysyn ortaǵa saldy.
«1. Mınıstrlikter fýnksııalaryn qaıta qaraý. Negizgi jáne qosalqy mindetterdi naqty bólý.
2. Táýelsiz agenttikter qurý. Mysaly, medısına men bilim salasyndaǵy ekonomıkalyq tıimdilikti baǵalaıtyn qurylymdar.
3. Vedomstvoaralyq kelisim júıesin engizý. Qarjylyq saldary bar sheshimder mindetti túrde syrtqy baǵalaýdan ótýi tıis.
4. Qoǵamdyq eseptilik ornatý. Mınıstrlikter shyǵyn emes, nátıje boıynsha esep berýi qajet.
5. Jeke sektordy qoldaý. Jeke mektepter men klınıkalar úshin teń múmkindik jasaý.
Ár mınıstrlik óz baǵytymen aınalysýy kerek. Salalyq organdar – mazmun men sapaǵa, ekonomıkalyq organdar – qarjy men tıimdilikke jaýapty bolýy tıis», dedi Rýslan Sultanov.
Ekonomıst mınıstrlikterdiń quziretin bólý memlekettik basqarýdy kúrdelendirmeıdi, kerisinshe, turaqty ári ashyq etetinin alǵa tartyp otyr.
