Burynǵy qazaqstandyq ǵalym Avstralııada áıelin óltirdi

ASTANA. 23 aqpan. Avstralııada turatyn burynǵy qazaqstandyq, aýyl sharýashylyǵy ósimdikteriniń gendi ınjenerııasy salasy boıynsha maman Serik Elibaıǵa ózi sekildi ǵalym áıeli Aınur Ismaǵuldy óltirdi degen kúdik tańylyp otyr. Bul týraly Avstralııanyń Adelaide Now basylymy habarlady. «Aýyl sharýashylyǵy daqyldaryn genetıkalyq jaǵynan zerteýshi halyqaralyq sarapshy ózi sekildi taǵy bir ǵalymdy, óziniń áıelin Klemzıgtegi úıinde óltirdi degen aıyppen sot aldyna bardy», - delingen habarlamada. Sonymen birge, «53 jastaǵy Serik Elibaı orys tildi aýdarmashymen Adelaıdanyń bitimger sýdıasy aldyna barǵanda, ózin kepildememen bosatý jóninde ótinish aıtqan joq». «Ol sáýir aıynda ótetin sotqa deıin endi qulyp astynda bolady», - dep atap ótilgen jarııalanymda.

Habarlanǵandaı, Elibaı qylmys ornynda ustalǵan. «Keshe, dúısenbi kúnniń keshinde (16 aqpan – QazTAG) saǵat 10:45 shamasynda polısııa Klemzıgtegi Tıstl avenıýine shaqyrý boıynsha jetip, Elibaıdyń áıeli Aınur Ismaǵuldyń jansyz denesiniń ústinen tústi. Ol qylmys ornynda tutqyndalyp, búgin (17 aqpan – QazTAG) tańerteń oǵan kisi óltirgeni jóninde aıyptaý usynyldy», - delingen habarlamada. Sondaı-aq polısııanyń úıden birneshe qaǵaz paketpen aıǵaq bolatyn zattardy alyp ketkeni aıtylady.

Kórshileriniń aıtýlarynsha, Elibaı men Ismaǵuldyń óte tatý-tátti jup bolyp ómir súrgenderin, ekeýiniń ul men qyz tárbıelep otyrǵandaryn, buǵan deıin úılerinen urys-janjal estilmegenin jetkizdi. 55 jastaǵy Aınur Ismaǵul QazKSR Mınıstrler Keńesi janyndaǵy QazTAG agenttigin kóp jyl basqarǵan Jumaǵalı Ismaǵulovtyń qyzy edi. Ol kúıeýimen birge 2006 jyldan beri Errbro qalasyndaǵy Avstralııa ósimdikterdiń fýnksıonaldy genomıka ortalyǵynda jumys jasap keldi. Serik Elibaı men Aınur Ismaǵul ǵylymı ortada aýyl sharýashylyǵy men genetıkasynyń mamandary retinde belgili bolatyn. Olar Avstralııaǵa kelip qonystanǵanǵa deıin Ýkraına, Kanada, Germanııa jáne Vengrııa sekildi kóptegen elderde turyp, jumys istegen. Murat Aıtqoja. Sýretter: QazTAG.