Foto: REUTERS/ Karam al-Masri
Jetken aqparattarǵa sáıkes keminde úsh turǵyn kóz jumyp, 25 adam jaraqat alǵan. Qaqtyǵys kúrdterdiń baqylaýyndaǵy Sheıh-Maqsud jáne Ashrafııa aýdandarynda bolǵan.
Atys Damaskide Sırııa prezıdenti Ahmed ash-Sharaa men Túrkııanyń joǵary laýazymdy ókilderi kezdeskennen keıin birneshe saǵattan soń bastaldy. Túrkııanyń syrtqy ister mınıstri Hakan Fıdan kúrd uıymdary naýryzda jasalǵan kelisimdi oryndaýǵa áli de qulyq tanytpaı otyrǵanyn aıtty.
Kelisim boıynsha Sırııanyń soltústik-shyǵysyndaǵy kúrdterdiń azamattyq jáne qarýly qurylymdary jyl sońyna deıin Damaskke baǵynatyn ortaq basqarý júıesine qosylýy kerek edi. Biraq taraptar ortaq mámilege kele almaı, bul jumys kesheýildep qaldy. Buǵan deıin qazan aıynda da osy aýdandarda qaqtyǵys bolyp, keıin atysty toqtatý týraly habarlanǵan.
Túrkııa óz shekarasynyń dál janynda qarýly kúrd jasaqtarynyń kúsheıip ketýin el qaýipsizdigine tóngen qaýip dep qabyldaıdy. Sol sebepti Ankara Sırııadaǵy soǵys kezinde birneshe ret shekaraǵa jaqyn aımaqtarǵa ásker kirgizgen. Al Sırııanyń syrtqy ister mınıstri Asad ash-Shaıbanı Damask kúrd kúshteriniń birigýge qatysty jaýabyn alǵanyn, qazir onyń eldiń birtutastyǵyna saı keletin-kelmeıtinin qarap jatqanyn aıtty.
