Baýyrjan Momyshuly soǵystyń alǵashqy keziniń ózinde-aq Aleksandr Bektiń áıgili «Volokolamskoe shosse» atty kitabynyń basty keıipkerine aınalyp, álem jurtyna keńinen tanyldy. Onyń qolbasshylyq qabileti men áskerı tásili álemdik soǵys ónerine «Momyshuly spırali» degen ataýmen endi. Tipti AQSh, Kýba, Izraıl jáne Nıkaragýanyń áskerı akademııalary Baýyrjan Momyshulynyń soǵys kezindegi tájirıbesin zerttep, ony strategııalyq jáne taktıkalyq oqý quraly retinde paıdalandy.
Baýyrjan Momyshuly áskerı qyzmetten soń da erlik kórsetti, jazýshylyqpen aınalysty. «Ofıser kúndeligi», «Bir túnniń tarıhy», «Moskva úshin shaıqas», «General Panfılov», «El basyna kún týsa» sekildi talǵampaz oqyrmannyń kóńilinen shyqqan kóptegen kitap pen áskerı estelik jazdy. Aqtyq demine deıin qaısarlyq tanytty, jastardy otanshyldyqqa, ultjandylyqqa tárbıeledi.
Batyr týraly 10 tomdyq kitaptyń avtory Mamytbek Qaldybaı jıyrma jyldan astam Baýyrjan Momyshulymen qoıan-qoltyq aralasyp, onyń surapyl soǵys pen dańqty qolbasshylar, ataqty zamandastary jónindegi áńgimelerin jalyqpaı tyńdady. Erekshe minez-qulqyna tereń úńilip, jurtqa beımálim syrlaryn kóńiline túıip, talaı ret batyrdyń tapqyrlyǵy men sheshendiginiń, eldik namysty alqalaǵan týrashyldyǵynyń, ómirdiń ár qubylysynan jańa oı túıe biletindiginiń kýási boldy.
Sonyń nátıjesinde Mamytbek Qaldybaıdyń kóptomdyǵyndaǵy Baýyrjan Momyshuly baıandaǵan K.Rokosovskıı, G.Jýkov, A.Vasılevskıı, I.Bagramıan, I.Panfılov, I.Chıstıakov, A.Fadeev, L.Sobolev A.Tolstoı, M.Áýezov, S.Muqanov, Ǵ.Músirepov, Ǵ.Mustafın, A.Jubanov, Q.Sátbaev, A.Pankratova, E.Bekmahanov tárizdi tulǵalar týraly áńgimeleri tyń derekterge baı, tartymdy, rýhanı tárbıelik máni óte tereń. Qaharman ómirinen syr shertetin 10 tomdyq jınaq «Bekasyl áýlıe» jeke qorynyń demeýshiligimen Almatydaǵy «Kerýlen Prınt» baspahanasynan jaryq kórdi.
Erjan ISAQULOV,
general-maıor, Jazýshylar odaǵynyń múshesi
