Petropavlda qysty shyǵaryp salý merekesi ótti

PETROPAVL. 23 aqpan. Oblys ortalyǵynda maslenısa jáne qysty shyǵaryp salý merekesi qalyń jurtshylyqtyń qatysýymen keń kólemde atap ótildi. Bul týraly oblystyq mádenıet basqarmasynyń baspasóz qyzmeti habarlady. Bul kúni ortalyq alań naǵyz halyqtyq toı-dýmanǵa aınalyp, túrli etnos-mádenı birlestikterdiń ulttyq taǵamdary usynylyp, salt-dástúrleri kórsetildi. Ár tilde ánder shyrqalyp, bıler bılenip, eskiden kele jatqan ádet-ǵuryptar men dinı yrymdar tamashalandy. Bir jerde sút pen bal qosylǵan qoıý shaı, dámdiligi til úıiretin ystyq kúlshe, samsa, baýyrsaq, býy burqyraǵan palaý usynylyp, saýda-sattyq qyzyp jatsa, endi bir jerde sporttyq oıyndarǵa jalǵasyp jatty. «Maslenısa» erteden toılanyp kele jatqan dinı meıramdardyń biri bolǵanymen, jyl ótken saıyn qatysýshylar qatary artyp keledi. Qysty shyǵaryp salý merekesimen tuspa-tus keletindikten, birge atap ótý dástúri qalyptasqan. – Alda Shyǵys meıramy-Naýryz kele jatyr. Endi Ulystyń uly kúnin de joǵary deńgeıde atap ótýge belsene qatysatyn bolamyz. Kez kelgen mereke halyqtar dostyǵy, birligi retinde atalyp júr, – deıdi «Orys qaýymdastyǵy» jergilikti uıymynyń tóraǵasy Nıkolaı Avdeev. «Maslenısanyń» basty attıbýttary – -kópshilikke quımaq taratylyp, sabannan jasalǵan tulyp/ chýchela/ órteldi. О́mir Esqalı. Derek: Soltústik Qazaqstan oblystyq mádenıet basqarmasynyń baspasóz qyzmeti. Sýret: kostnews.kz.