Foto: Aqorda
«Qazir Astana qarqyndy ósip keledi. Túrli baǵyt boıynsha belsendi jumys istelip jatyr. Búgin elordany damytýdyń ózekti máselelerin talqylaımyz. Sońǵy 11 aıda qysqa merzimge arnalǵan ekonomıkalyq ındıkator 118,6 paıyzǵa jetti. Investısııa, qurylys, shaǵyn jáne orta bıznes salasyndaǵy kórsetkishter boıynsha Astana aldyńǵy orynda tur. Elordanyń kósh basynda bolýy – zańdylyq», dedi Prezıdent.
Memleket basshysynyń aıtýynsha, bıyl elordadaǵy turǵyn úı qurylysy 5 mıllıonǵa jýyq sharshy metrdi quraıdy. Bul elimizde paıdalanýǵa berilgen baspananyń tórtten biri jáne Ortalyq Azııa aımaǵyndaǵy basqa astanalardyń kórsetkishterinen birneshe ese artyq.
«О́ńdeý ónerkásibi óniminiń kólemi 2025 jyldyń 11 aıynda 2,8 trıllıon teńgege jetip, 7,2 paıyz ósti. Iаǵnı 6 mıllıard dollar shamasynda. Bıylǵy 11 aıda saýda kólemi 10,8 trıllıon teńgeden asyp, 8,4 paıyz ósim kórsetken Bul –shamamen 22,5 mıllıard dollar. Maǵan berilgen málimet boıynsha, qala bıýdjetine 4,3 trıllıon teńge salyq túsken. Muny qomaqty qarjy deýge bolady. Astananyń 2024 jylǵy óńirlik jalpy ónim kólemi 15 trıllıon teńgeden sál asty. Bul – 32 mıllıard dollar. Bıylǵy qorytyndy boıynsha 34, tipti, 35 mıllıard dollar (17 trıllıon teńge nemese odan da joǵary) bolady dep kútilýde. Al qaladaǵy halyqtyń resmı sany 1,6 mıllıon adamǵa jetken», dedi Qasym-Jomart Toqaev.
Buǵan deıin Memleket basshysy shynjyr tabandy jáne dóńgelekti brondy mashınalar shyǵaratyn, sondaı-aq olarǵa tehnıkalyq qyzmet kórsetetin Besqaru zaýytyn aralap kórdi.
