AQTAÝ. 23 aqpan. Mańǵystaý ónerpazdary, ıaǵnı Murat О́skinbaıuly atyndaǵy Mańǵystaý oblystyq fılarmonııasynyń óner ujymy Túrikmenstan Respýblıkasynda konsert berdi. Bul týraly egemen.kz tilshisi habarlady.
Túrkmenbashı qalasynda «Túrikmenstan jáne Qazaqstan Kóshbasshylarynyń Uly Jibek Jolyn jandandyrýdaǵy róli» atty ǵylymı - tájirıbelik konferensııaǵa jáne eki el ónerpazdarynyń qatysýymen bolatyn «Túrikmenstan men Qazaqstan Respýblıkasy arasyndaǵy shekara – baýyrlastyq shekarasy, ǵasyrlyq Dostyq pen Beıbitshilik shekarasy» atty konsertke qazaqstandyq ónerpazdar shaqyrtý alǵan bolatyn.
Túrikmenstan prezıdenti G.Berdymuhametovtyń eki el arasyndaǵy shekaralyq yntymaqtastyqty jandandyrý maqsatyndaǵy «Beıtaraptyq pen Beıbitshilik» jylyna sáıkes berilgen tapsyrmalary aıasynda ótken is-sharada M.О́skinbaev atyndaǵy Mańǵystaý oblystyq fılarmonııasynyń «Aqjarma» folklorlyq ansambli men bı toby óz ónerin kórsetti.
Qurmanǵazy atyndaǵy Qazaq Ulttyq konservatorııasynyń professory, mádenıet qaıratkeri Amandyq Kómekuly qazaq tilinde óner kórsetip qana qoımaı, túrikmen ulttyq aspaby «dýtar» súıemelimen túrikmenshe jyrlady.
Konsertte túrikmen yrǵaǵyndaǵy birneshe kúıler oryndalyp, konsert eki eldiń birlesken bı ujymynyń sahnalandyrylǵan bı qoıylymymen aıaqtaldy.
Qazaqstan delegasııasymen barǵan ónerpazdardy Túrkmenbashı qalasyndaǵy Qazaqstan Respýblıkasynyń elshisi Muhıt Sovetuly Orazaev jáne Túrikmenstannyń Balqan ýálaıaty ákimdigi ókilderi qarsy alyp, qurmetpen shyǵaryp saldy.
Gúlaıym Shyntemirqyzy.
Derek, sýret: egemen.kz.
